SQO-da jaı túsip, 15 ga aýmaq janyp ketti
Áleýmettik jelide alapat órttiń beınejazbasy paıda boldy. Kýágerlerdiń aıtýynsha, Aqqaıyń aýdany Rýblevka eldi mekeniniń mańy janyp, aýylǵa qaýip tóndi.
SQO tótenshe jaǵdaılar departamentiniń málimetinshe, búgin saǵat 14.50 mınýt ketkende Aqqaıyń aýdany Smırnov eldi mekenindegi №9 órt sóndirý bólimine Rýblevka eldi mekeniniń mańynda órt shyqqandyǵy jóninde habar túsken.
Oqıǵa ornyna bir tehnıka jáne jeke quramnan úsh adamy bar kezekshi qaraýyl jetti. Mamandar kelgende batpaqtaǵy qamys janyp jatqan.
Órtti sóndirýge, sondaı-aq «I.Zenchenko» JShS tehnıkalary men jumysshylary, Aqqaıyń orman sharýashylyǵynyń 6 qyzmetkeri men 2 tehnıkasy jetti.
Mamandardyń aıtýynsha, órttiń shyǵýyna jaıdyń túsýi sebep bolǵan.
Aqqaıyń aýdany tótenshe jaǵdaılar bóliminiń bastyǵy Erjan Sháripovtyń aıtýynsha, Rýblevka eldi mekenine keler qaýip joq. Órttiń joly jyrtyldy.
«Aýdan ákimimen birge oqıǵa ornynda júrmiz. Eki-úsh oshaq qana qaldy sóndirilmeı, olardan keler qaýip joq, óıtkeni aınalasyn bárin jyrtyp shyqtyq.
Qazir Aqqaıyń orman sharýashylyǵynyń qyzmetkerleri, jergilikti atqarýshy bılik ókilderi kezekshilik atqaryp jatyr», - deıdi Erjan Sháripov.