SQO-da jastardyń turaqtaýy men mamandardyń kelýine qosymsha jaǵdaı jasalady - Asqar Mamın
«Memleket basshysynyń tapsyrmasymen Úkimet Soltústik Qazaqstan oblysynyń ákimdigimen birlesip, osy óńirdiń Áleýmettik-ekonomıkalyq damýynyń keshendi josparyn jańartty. Qazirgi tańda, keshendi jospardyń jalpy ınvestıtsııanyń kólemi shamamen 2 trln teńgeni qurap otyr. Onyń basym bóligi – jeke ınvestıtsııalar. Oblysqa jeke ınvestıtsııa tartý jańa jobalardy iske asyrýǵa, sapaly jumys oryndaryn qurýǵa jáne óńir ekonomıkasynyń jańa qurylymyn qalyptastyrýǵa múmkindik beredi», - dedi Premer-Mınıstr Úkimet otyrysynda.
A. Mamınniń aıtýynsha, aldyn ala baǵalaý boıynsha keshendi jospardyń iske asyrylýy óńdeý ónerkásibi men aýyl sharýashylyǵy ónimderiniń kólemin 1,5 ese ulǵaıtýǵa múmkindik beredi. Jalpy óńirlik ónimniń ósý qarqynyn 5,2 paıyzǵa deıin qamtamasyz etedi. Jańa ósý núkteleri paıda bolady. Oblystyń ınfraqurylymy jaqsarady.
«Jalpy óńir sapaly damý úshin jańa ımpýlske ıe bolady. Eń bastysy, 26 myń jumys orny qurylady. Qarjylandyrý kóleminiń artýy men halyqtyń turmys sapasynyń jaqsarýy óńirdegi kóshi-qon úrdisterin turaqtandýǵa múmkindik berip, jastardyń turaqtaýy men mamandardyń kelýine qosymsha jaǵdaı jasaıtyn bolady. Buǵan bilim berý men densaýlyq saqtaý salalaryn belsendi damytý septigin tıgizedi», - dedi Prmer-Mınıstr.
Úkimet otyrysy barysynda Soltústik Qazaqstan oblysynyń 2021-2025 jyldarǵa arnalǵan áleýmettik-ekonomıkalyq damýynyń keshendi jospary bekitildi.
«Ulttyq ekonomıka mınıstrligine jáne Soltústik Qazaqstan oblysynyń ákimdigine múddeli memlekettik organdarmen birlesip, keshendi jospardyń is-sharalaryn ýaqtyly jáne sapaly oryndaýdy qamtamasyz etýdi tapsyramyn», - dedi Asqar Mamın.
Budan buryn habarlanǵandaı, búgin Úkimet otyrysynda QR Ulttyq ekonomıka mınıstri Áset Erǵalıev Soltústik Qazaqstan oblysynyń 2021-2025 jyldarǵa arnalǵan áleýmettik-ekonomıkalyq damýynyń keshendi josparyn tanystyrdy. Ony iske asyrýdyń jalpy somasy 1,8 trln teńge. Osy oraıda Soltústik Qazaqstan oblysynda 2,3 mln sharshy metr nemese 21,7 myń páter salynatyny belgili boldy. Qoıma jáne saýda alańdarymen qamtamasyz etý úshin «Qyzyljar» saýda-logıstıkalyq haby qurylady.