SQO-da jasalǵan taýarlar byltyr álemniń 34 eline eksporttaldy

PETROPAVL. QazAqparat – Soltústik Qazaqstan oblysynda byltyr berilgen eksporttyq sertıfıkattar sany 15% artty. Jergilikti ónim álemniń 34 eline eksporttaldy, dep habarlaıdy QazAqparat tilshisi.

SQO Kásipkerler palatasy baspasóz qyzmetiniń málimetinshe, byltyr palata mamandary taýardyń shyǵý tegin kórsetetin 3066 sertıfıkat berdi, onyń 2624-in jergilikti eksporttaýshylar alǵan.

«Ótken jyldy qorytyndylaıtyn bolsaq, eksporttyq sertıfıkattarǵa da, ishki aınalym sertıfıkattaryna da ótinimderdiń kóbeıgenin baıqaımyz. Bizdiń eksporttaýshylarǵa bergen sertıfıkattar sany 2022 jyly 15%, al CT-KZ boıynsha 32% ósti», - deıdi SQO Kásipkerler palatasynyń dırektory Tımýr Bekeev.

Byltyr SQO ónimi álemniń 34 eline eksporttaldy, olardyń ishinde Reseı, Belgııa, Ázerbaıjan, Iran, Tájikstan, Túrikmenstan, Qytaı, Túrkııa, Aýǵanstan, Nıderlandy, Italııa jáne taǵy basqa memleketter bar. Eń kóp ımporttaýshy el – Ózbekstan. Kórshi memleketke negizinen bıdaı, kebek jáne bıdaı krahmaly jiberiledi.

Sondaı-aq ótken jyly Eýroodaq elderine de kóptegen taýar túri eksporttaldy. Iranǵa arpa, bıdaı, Aýǵanstanǵa – un, taýyq jumyrtqasy, Qytaıǵa – bıdaı men zyǵyr maıy, Túrkııaǵa – qatty bıdaı men jasymyq jetkizildi.

Memlekettik satyp alýǵa qatysý úshin taýar jetkizýshiler jáne qyzmet kórsetýshiler de otandyq óndirýshiler tiziliminde ekenin rastaıtyn Indýstrııalyq sertıfıkat alady. Byltyr osyndaı 7 sertıfıkat berilgen.