SQO-da jas kásipkerlerge arnalǵan HUB jumys isteı bastady
SQO Kásipkerler palatasy oqý ornynda bıznes-ınkýbatordyń ashylýyna kómek kórsetti. Jańa jyl merekesi qarsańynda Petropavlda jas kásipkerlerdiń qolynan shyqqan buıymdardyń jármeńkesi ótti.
Aımaqtyq kásipkerler palatasy baspasóz qyzmetiniń habarlaýynsha, «Altyn arman» bazarynda Soltústik Qazaqstan servıs jáne kásibı daıyndyq kolledjiniń stýdentteri qoldan jasaǵan shyrsha oıynshyqtaryn, toqyma buıymdar, áshekeılerdi saýdaǵa shyǵardy.
«Men tiginshi mamandyǵyna oqyp jatyrmyn. Jármeńkege ózim tikken jastyqtardy, oıynshyqtardy, qalam-qaryndash salatyn sómkeni ákeldim. Sondaı-aq túzetý mektebiniń oqýshylary ózderi jasaǵan buıymdaryn berip jiberdi. Jármeńkeden túsken qarajatty aparyp beremiz. Biz búgin suranysqa ıe zattardy satyp jatyrmyz. Tutynýshyǵa ne kerek ekenin arnaıy trenıngter men sheberlik saǵattarynda oqyp bildik», - deıdi kolledjdiń ekinshi kýrs stýdenti Evgenııa ıAkovleva.
Jas kásipkerlerge arnalǵan HUB jeltoqsan aıynyń basynda ashyldy. Bul jármeńke – bıznes-ınkýbator jumysynyń alǵashqy nátıjesi.
«HUB-ty ashý arqyly biz stýdentter men oqýshylarǵa kásipkerlik negizderin úıretýdi maqsat ettik. Bul jerde jastar bilimin jetildiredi, tájirıbe almasady, bıznes-ıdeıalaryn iske asyrýda qoldaý tabady. Bizdiń bıznes-ınkýbatorlardan óz isin ashýǵa daıyn jas kásipkerler shyǵady dep senemin», - deıdi Soltústik Qazaqstan servıs jáne kásibı daıyndyq kolledjiniń kásipkerlik sheberi Svetlana Pýıanaýskene.
Svetlana Pýıanaýskene qarasha aıynda Londonda bolyp, bıznes-ınkýbator qurýdan tájirıbe aldy. Al aqpan aıynda Ulybrıtanııanyń sarapshysy SQO-ǵa kelip, jańadan qurylǵan HUB boıynsha pikirin bildiredi, jumysyn jetildirýde aqyl-keńes beredi. Korporatıvti ortalyqtyń tıisti deńgeıde jumys isteýine jergilikti kásipkerler palatasy da at salyspaq. Palatanyń sarapshylary sheberlik saǵattaryn uıymdastyryp, semınar-trenıngter ótkizedi.
«Ulybrıtanııadan oqytýshy kelgennen keıin on kún ishinde HUB uıymdastyrýǵa kómektestik. Bul HUB-tyń basqalardan ereksheligi – jas kásipkerlerdi ázirleýde erekshe oqytý qajettiligi bar balalarǵa basymdyq berý. Biz olardy óz bilimi men sheberligin eńbek naryǵynda satýǵa jáne óz kásibin ashýǵa úıretemiz. Bolashaqta óńirdiń tájirıbeli kásipkerlerin osy jumystarǵa tartamyz. Olar bizdiń balalar úshin mentor bolady», - dedi SQO Kásipkerler palatasynyń bólim basshysy Vladımır Lıtvınenko.
HUB-qa oblystyń basqa kolledjderi men mektepteriniń oqýshylary kelip, kásipkerliktiń alǵysharttaryn meńgere alady.