SQO-da jańadan salynǵan asfalt jol ydyrap ketken

PETROPAVL. QazAqparat – Soltústik Qazaqstan oblysynda jańadan salynǵan asfalt jol ydyrap ketti. Óńir turǵyndary kópten kútken joldyń sapasyz salynǵanyna nalyp, shashylǵan asfalttiń fotolaryn áleýmettik jelide taratty, dep habarlaıdy QazAqparat tilshisi.

Jańa asfalt Aıyrtaý aýdanyndaǵy «Saýmalkól-Syrymbet-Qaraqamys-Svetloe» avtomobıl jolyna tóselgen.

Fotoda qara asfalttiń shetinen ydyraı bastaǵanyn kórýge bolady. Turǵyndardyń keıbiri jańa joldyń astyna negiz retinde tas tóselmegenin aıtýda.

30 shaqyrymdyq bul aýdandyq mańyzy bar avtomobıl jolynda ortasha jóndeý jumystary byltyr bastalǵan.

Aldaǵy eki jylda 26,8 km asfalt tóselýi tıis.

Aıyrtaý aýdandyq ákimdigi áleýmettik jelide tarap ketken fotonyń astyna jazba qaldyrdy.

«Saýmalkól-Syrymbet-Qaraqamys-Svetloe» aýdandyq mańyzy bar avtomobıl jolynda merdigerlik uıym qurylys jumysyn júrgizip jatyr. Qazirgi ýaqytta jumys aıaqtalǵan joq, sondyqtan bul jol áli qabyldanyp, paıdalanýǵa berilgen joq. Bul ýchaskede joldyń buzylǵan jerleri bar. Tehnıkalyq qadaǵalaý ony anyqtap, merdigerge dereý joıý týraly eskertý berdi. Jaqynda jańa asfalt buzyp alynyp, ornyna jańasy tóseledi», - delingen habarlamada.

SQO-da 9 myń km shamasynda avtomobıl joldary bar. Uzyndyǵy boıynsha elimizde ekinshi orynda tur.

Bıyl, oblystyq ákimdiktiń málimetinshe, 705 km jol jónge keltirilmek, onyń 110 km – respýblıkalyq mańyzy bar, 480 km jergilikti jáne 115 km – 47 eldi mekenniń aýylishilik joldary. Bul maqsatqa 40 mlrd teńge bólingen.