SQO-da jańa oqý jylynan bastap bastaýysh synyp oqýshylary tegin tamaqtanady
Bul jaıynda SQO ákimi Aıdarbek Saparov áleýmettik jelidegi paraqshasynda jazdy.
«Oqýshylar men olardyń ata-analary úshin jaqsy jańalyqpen bóliskim keledi. Jańa oqý jylynan bastap 1-4 synyp oqýshylary tegin ystyq tamaqpen qamtamasyz etiledi. Osylaısha, Petropavl qalasy men oblystyń barlyq aýdandarynyń bastaýysh synyp oqýshylary qamtylady. Osynyń arqasynda ata-analar otbasy bıýdjetin únemdeı alady. Qazir oblysta az qamtylǵan jáne kóp balaly otbasylardyń balalary tegin ystyq tamaqpen qamtylǵanyn atap ótkim keledi», - dep jazdy Aıdarbek Saparov.
Qazirgi ýaqytta mektep ashanalarynda túski astyń baǵasy – 500 teńge. Alaıda, ony kúndelikti berýge ár ata-ananyń qaltasy kótere bermeıdi.
Petropavldyq kásipker Nurlan Tilemisovtyń aıtýynsha, balalarǵa ystyq tamaqty tegin qylý – keremet bastama.
«Men Petropavldaǵy eki mekteptiń oqýshylaryn tamaqtandyramyn. Keıbir ata-analar úshin balalaryna túski asty alyp berý qymbat bolǵandyqtan, mundaı oqýshylar kondıter ónimderin satyp alyp, densaýlyǵyna zııan keltiredi. Qazirgi ýaqytta №6 mektep boıynsha bastaýysh synyp oqýshylarynyń 90%-y, al №2 mektep boıynsha 30%-y ǵana kúndelikti ashanadan ystyq tamaq alyp ishedi», - deıdi ol.
Aıta ketsek, oblysta búginde 72 myńnan astam oqýshy bar. Onyń 31 180-i – bastaýysh synypta oqıdy.