SQO-da zeınetke shyǵyp ketken tergeýshi 45 mln teńge paraǵa qatysy bar degen kúdikpen ustaldy

PETROPAVL. QazAqparat – Soltústik Qazaqstan oblysynda aýyr sybaılas jemqorlyq qylmysty jasyrdy degen kúdikpen ekonomıkalyq tergeý qyzmetiniń burynǵy qyzmetkeri ustaldy, dep habarlaıdy QazAqparat tilshisi.

SQO boıynsha ekonomıkalyq tergeý departamentiniń málimetinshe, vedomstvonyń burynǵy qyzmetkerine Petropavl aýyr mashına jasaý zaýytynyń laýazymdy adamdarynyń 45 mln teńge kóleminde para alǵanyn bile otyryp, bul faktini azamattyq-quqyqtyq mámile dep jasyrýǵa tyrysty degen aıyp taǵyldy.

«Advokattyq qoǵamdastyqtan kelip túsken ótinishterge baılanysty vedomstvonyń eks-qyzmetkeri D.Tampıev zeınetke shyqqannan keıin advokattyq praktıkamen aınalysatynyn, astanalyq advokattar alqasynyń múshesi ekenin rastaımyz. Alaıda, ustaý kezinde ol osy qylmystyq is boıynsha qorǵaýshy mártebesine ıe bolmady jáne áleýmettik jelilerde aıtylǵandaı, protseske qatysýshylarǵa advokattyq qyzmet kórsetken joq», - delingen departamenttiń baspasóz qyzmeti taratqan habarlamada.

D. Tampıev jáne para aldy dep kúdikke ilingen taǵy 2 adam sottyń sanktsııasymen 2 aı merzimge qamaýǵa alyndy.

Іstiń anyq-qanyǵyna jetý úshin, sondaı-aq zańdy jáne negizdelgen protsessýaldy sheshim qabyldaý maqsatynda tergeý júrgizilip jatyr.

«Qylmystyq-protsessýaldyq kodekstiń 201-babyna saı ózge aqparat jarııa etýge jatpaıdy. Konstıtýtsııanyń 77-babyna jáne Qylmystyq-protsessýaldyq kodekstiń 19-babyna sáıkes D.Tampıev pen basqa da aıyptalýshylar qylmys jasaýdaǵy kinási anyqtalyp, sot úkimi zańdy kúshine engenshe kinásiz bolyp sanalatynyn atap ótken jón», - deıdi baspasóz qyzmetindegiler.