SQO-da vırýsqa baılanysty 1,5 tonna qyzanaqty órteýge týra keldi
SQO aýmaqtyq ınspektsııanyń málimetinshe, 1500 kg qyzanaq partııasy Reseıge jóneltilýi tıis bolǵan. Oblystyq aýmaqtyq ınspektsııanyń ósimdikter karantıni jónindegi ınspektory ónimnen úlgi iriktep alyp, Astana qalasynyń Ósimdikter karantıni jónindegi respýblıkalyq ortalyǵyna PTsR test júrgizý úshin saraptamaǵa jiberdi. Ol jerde kókónis qońyr qatparly vırýsqa, qyzanaqtyń qola tústes tospovırýsyna jáne pepıno mozaıkasyna tekserildi. Nátıjesinde qyzanaqtan qola tústes tospovırýs tabyldy.
Qazaqstan Respýblıkasy Ákimshilik quqyq buzýshylyq týraly kodeksiniń 400-baby 2-tarmaǵy 3-tarmaqshasyna sáıkes júk ıesine 20 AEK - 73 840 teńge aıyppul salyndy. Zaqymdanǵan 1,5 tonna tomat órtelip, tolyq joıyldy.
Mamandardyń aıtýynsha, qyzanaqtyń qola tústes tospovırýsy adam úshin qaýipsiz. Alaıda karantındik aýrýdyń paıda bolýy kókónis sharýashylyǵyna aıtarlyqtaı zııan keltirýi múmkin. Ádette bul vırýs tomat pen burysh úshin qaýipti, shyqqan ónimniń 80% joıýy múmkin.
Qyzanaqtyń qola tústes tospovırýsymen kúreste dástúrli ádister: topyraqty dezınfektsııalaý, qopsytý, folgamen jaýyp qyzdyrý - nátıje bermeıdi. Vırýsty joıý qural-saımandy zararsyzdandyryp, qoldy jıi sabyndap jýyp, aıaq kıimdi tazartý kerek. Al juqtyrǵan ónimdi órtep joıý qajet.