SQO-da vaktsına alýy tıis turǵyndardyń 75 paıyzdan astamy ekpe saldyrdy

PETROPAVL. QazAqparat – Soltústik Qazaqstan oblysynda 281 623 adam vaktsınatsııanyń tolyq kýrsynan ótti. Bul – ımmýndaý kýrsynan ótýi tıis turǵyndardyń shamamen 75 paıyzy, dep habarlaıdy QazAqparat tilshisi.

SQO densaýlyq saqtaý basqarmasy baspasóz qyzmetiniń málimetinshe, óńirde 298 785 adam koronavırýsqa qarsy vaktsınanyń birinshi komponentin, 281 623 adam ekinshi komponentin aldy. Ekpe saldyrýy tıis turǵyndardyń tek 75%-ǵa jýyǵy ǵana vaktsınalandy. Al revaktsınatsııadan 85 348 adam nemese 43 %-y ótti.

«Revaktsınatsııadan ótýdiń mańyzy zor. Qaýipti ınfektsııa bul jaǵdaıda jeńil nemese sımptomsyz ótedi. Qazirgi tańda oblysta negizinen Vero Cell preparaty qoıylyp jatyr. Al júkti, bosanǵan áıelderge «Pfizer» qoldanylady. 60 jastan asqandar tańdaý boıynsha Vero Cell, «Pfizer» jáne «Spýtnık Laıt» preparatyn saldyra alady», - deıdi mamandar.

«Pfizer» vaktsınasynyń birinshi komponentin osy kúnge deıin 12 815 adam alǵan. Tolyq kýrstan 9 243 adam ótti. Onyń ishinde jasóspirimderdiń úlesi basym. Birinshisin 10 240 jasóspirim, 357 júkti áıel jáne 2 218 emizýli balasy bar kelinshek saldyrǵan. Tolyq kýrstan 7 364 jasóspirim, 235 júkti áıel jáne 1 644 jas ana ótti.