SQO-da úzdik baspasóz hatshysy anyqtaldy
Buqaralyq aqparat quraldary qyzmetkerleri kúni qarsańynda QR Jýrnalıster Odaǵynyń fılıaly dástúr boıynsha túrli atalymdar boıynsha úzdikterdi anyqtap, marapattady. Jyldyń úzdik baspasóz hatshysy bolyp SQO Polıtsııa departamenti baspasóz qyzmetiniń mamany – Dınara Saǵyndyqova tanyldy.
Polıtsııanyń podpolkovnıgi baspasóz qyzmetindegi áriptesteri sııaqty táýlik boıy jýrnalıstermen baılanysta, olar úshin mereke, demalys joq deýge bolady. Kásibı meıram qarsańynda Dınara óńir basshysy Qumar Aqsaqalovtyń alǵys hatymen de marapattaldy.
Dınara Saǵyndyqova ishki ister organdaryna 15 jyl buryn keldi. 2005 jyly ony qyzmetke alý týraly buıryqqa sol kezdegi SQO Polıtsııa departamentiniń bastyǵy Erlan Turǵymbaev qol qoıdy.
«Erkin qalam terbep úırengen maǵan bastapqyda vedomstvonyń qatań sheńberi aıasynda jumys isteý qıynǵa soqty. Biraq tatý, yntymaǵy jarasqan ujymmen tez til tabysyp, úırenisip kettim. Baspasóz qyzmetkeri ámbebap jaýynger bolýy kerek: ózi - fotograf, ózi – operator, ózi aqparat jınap,ony zań aıasynan shyqpaı, birneshe qaıtara tekserip baryp jazýy qajet. Qoǵamdyq mańyzy bar aqparatty berýde bireýge basymdyq berýge bolmaıdy», - deıdi polıtsııa podpolkovnıgi.
Únemi izdenis ústinde, óz bilimin jetildirýmen júretin Dınara qazir «Jýrnalıstıka» mamandyǵy boıynsha magıstratýrada oqıdy. Zaman aǵymynan qalmaýǵa tyrysady. Byltyr Reseıde ótken «Şıt ı pero» atty halyqaralyq baıqaýda «Yntymaqtastyq» atalymynda onyń «Doroga slavy» atty eńbegi jeńiske jetti.
Dınaranyń joldasy Abaı da polıtsııada qyzmet etedi, patrýldi polıtsııa batalonynyń vzvod komandıri, túrli mýzykalyq aspaptarda oınaıdy. Qyzy Anel ákesi sııaqty ónerge jaqyn, ol – óner kolledjiniń 2 kýrs stýdenti bolsa, uly Batyrhan mektep-lıtseıdiń 6 synybynda oqıdy.
«Turǵyndardy quqyq qorǵaý organdarynyń kúndelikti jumysynan habardar etýdegi bizdiń eńbegimizdi qoǵamnyń baǵalap, eskerip jatqanyna qýanyshtymyz. Dınara Amangeldiqyzy – jumysyna jan-tánimen berilip, úlken jaýapkershilikpen isteıtin senimdi áriptes. Qandaı máseleniń bolmasyn mánin birden túsinip, qajetti sheshim qabyldaı alady. Shyǵarmashylyq qabileti óte joǵary, tez til tabysqysh», - deıdi SQO Polıtsııa departamentiniń ishki jáne syrtqy kommýnıkatsııalar bóliminiń jetekshisi Mádına Balǵashoqova.