SQO-da úı janýarlary men qusqa ekpe salýǵa 441 mln teńge bólindi

PETROPAVL. QazAqparat – Soltústik Qazaqstan oblysynda úı janýarlary men qusty túrli aýrýlarǵa qarsy vaktsınatsııalaý jumystary júrgizilip jatyr.

Bul maqsatqa jergilikti bıýdjetten 441 mln teńge shamasynda qarajat bólingen, dep habarlaıdy QazAqparat tilshisi.

SQO veterınarııa basqarmasynyń málimetinshe, ekpe naýqany bastalǵaly 133 myń iri qara maldan synama alynyp, onyń 134-inde brýtsellez tabyldy.

Jalpy óńirde vaktsınatsııa 60 %-ǵa oryndalyp, 900 myńǵa jýyq qus pen úı janýaryna ekpe salyndy. Bul jumystarǵa oblys bıýdjetinen 441 mln teńge shamasynda qarajat bólingen.

Mamandardyń aıtýynsha, vaktsına sibir jarasyna, pasterellez, dermatıtke, qus tumaýyna, týberkýlezge, qutyrmaǵa jáne basqa da aýrýlarǵa qarsy egiledi.

Tórt túlikten bólek osy ýaqytqa deıin 2 900 ıtke, 420 mysyqqa qutyrma aýrýyna qarsy vaktsına salynǵan. Bul barlyq egilýi tıis ıt-mysyqtyń shamamen 70 %-y.

«Kóktemgi vaktsınatsııa naýryz aıynda bastaldy. Tórt-túlikti zertteý kezinde aldymen qanyn alyp, olardy jeke nómirlep, qulaqtaryna belgi taǵamyz.

Egerde maldan aýrý tabylsa, sol nómir arqyly anyqtap, birden soıýǵa jiberemiz. Sondaı-aq, qazirgi ýaqytta úı janýarynyń pasporty qajet emes.

Arnaıy baza bar, soǵan bári engizilgen. Bul óte yńǵaıly, bar aqparat sol jerde», - deıdi veterınar Irına Gýskova.

Jalpy oblysqa respýblıkalyq qordan 3,5 mln astam dana preparat bólingen.

121 mln teńgeniń 2 mln jýyq dozasy jetkizildi. Bul kóktemgi vaktsınatsııalaýǵa arnalǵan. Veterınarlar naýqandy mamyrdyń sońyna deıin aıaqtamaq.