SQO-da úsh jyldan beri uly men qyzyn zorlap kelgen er adamǵa úkim shyqty

<p>Soltústik Qazaqstan oblysynda eki balasyna jynystyq zorlyq kórsetken er adamdy sot ómir boıyna bas bostandyǵynan aıyrdy, dep habarlaıdy <a href="https://kaz.inform.kz/" target="_blank" rel="noopener">Kazinform</a> agenttigi.</p>

Sottalǵan — Ózbekstan azamaty Beknııazov. Ol otbasymen SQO M.Jumabaev aýdanynda turǵan.

Buǵan deıin polıtsııa departamentinde er adamnyń mas kúıinde qyzy men ulyn zorlaǵany týraly aıtylǵan edi.

Qylmystyq is sotta jabyq qaraldy.

SQO qylmystyq ister jónindegi mamandandyrylǵan aýdanaralyq sotynyń málimetinshe, er adam 2020 jyldan bastap bıylǵy 30 qańtarǵa deıin kámelet jasyna tolmaǵan qyzy men ulyn birneshe ret zorlaǵan.

Onyń kinási tolyq dáleldendi.

Sottalýshynyń kinási jábirlenýshilerdiń, jábirlenýshilerdiń zańdy ókiliniń, kýágerniń aıǵaqtarymen, saraptamalardyń qorytyndylarymen tolyq dáleldendi.

Sottalýshy men onyń advokaty aıyptaýmen kelispedi, aqtaýdy surady.

Sot jaýapkershilik pen jazany aýyrlatatyn mán-jaı retinde qylmystyń mas kúıinde jasalǵanyn esepke aldy.

Sot er adamnyń jazasyn jeńildetetin mán-jaılardy anyqtaǵan joq.

«Jasalǵan qylmystardyń asa aýyr qylmystar sanatyna jatatynyn jáne qoǵamdyq qaýiptilik dárejesin, istiń mán-jaılaryn, kináliniń jeke basyn eskere otyryp, sot barynsha qatań jaza taǵaıyndaý qajettigi týraly qorytyndyǵa keldi. Sot er adamǵa pedagogıkalyq jáne kámeletke tolmaǵandarmen jumys isteýge baılanysty laýazymdardy atqarýǵa ómir boıyna tyıym sala otyryp, ony ómir boıyna bas bostandyǵynan aıyrý jazasyn kesti» delingen qylmystyq ister jónindegi mamandandyrylǵan aýdanaralyq sottyń baspasóz habarlamasynda.

Sottalǵan jazasyn tótenshe qaýipsizdik mekemesinde óteıdi.

Sot úkimi zańdy kúshine engen joq.