SQO-da úsh aptada zańsyz ańshylyqtyń 100-den astam faktisi tirkeldi
SQO polıtsııa departamenti baspasóz qyzmetiniń málimetinshe, Aqqaıyń aýdanynyń aýmaǵynda ótken osyndaı kezekti reıdke tabıǵatty qorǵaý polıtsııasy tobynyń qyzmetkerleri, «Sovetskoe» ańshylyq sharýashylyǵynyń dırektory men qoryqshylary atysty.
Olar orman ishinen myltyq daýsyn estip, mashına farasynyń jaryǵyn baıqap qalady. Túnde kórýge múmkindik beretin arnaıy qurylǵynyń kómegimen eki adamnyń sulbasyn jáne janýarlardyń etin kólikke tıep jatqanyn kórgen.
Tártip saqshylary «Audi» avtokóligin toqtatty. Onyń ishinde aýdannyń 31 jáne 37 jastaǵy eki turǵyny bolǵan. Kóliktiń júksalǵyshynan eki sibir eligi tabyldy. Er adamdar ańshylyqpen zańsyz aınalysqan eken.
Sondaı-aq kóliktiń salonynan 12-shi kalıbrli tegis uńǵyly «MR» myltyǵy, qyzǵylt tústi daqtar bar pyshaq tabylyp, tárkilendi. Myltyq kúdiktilerdiń eshqaısysynyń atyna tirkelmegen.
«Kúdiktiler 5 jylǵa deıin bas bostandyǵynan aıyrylýy múmkin. «Brakokoner» is-sharasy 20 qazan men 19 qarasha aralyǵynda ótip jatyr. Maqsat — zańsyz ańshylyqqa, ańshylyq jáne balyq aýlaý qaǵıdalaryn buzýǵa jol bermeý. Jedel-profılaktıkalyq is-shara aıasynda zańsyz ań aýlaýdyń 110 jáne ań-balyq aýlaý qaǵıdalaryn buzýdyń 15 deregi anyqtaldy», — deıdi SQO PD jergilikti polıtsııa qyzmeti basqarmasy quramyndaǵy tabıǵatty qorǵaý polıtsııasy tobynyń erekshe tapsyrmalar jónindegi aǵa ınspektory Ashat Qojabaev.
Buǵan deıin SQO-da otbasy shyrqyn buzǵan 500-ge jýyq adamnyń qamalǵanyn jazdyq.