SQO-da úsh adamnyń ólimine qatysty is alqabıler sotynda qaralyp jatyr

<p>Soltústik Qazaqstanda 3 adamnyń ólimine qatysty sot otyrysy jalǵasyp jatyr. Aıyptalýshy 25 jastaǵy Aleksandr Kanışev óz inisin, azamattyq nekedegi áıeli men onyń qyzyn óltirip, artynsha úıin órtep jiberdi degen kúdikke ilinip otyr. Bul týraly <a href="http://almaty.tv./" target="_blank" rel="noopener">Almaty.tv.</a> jazdy.</p>

Marqumdardyń máıiti byltyr qyrkúıekte jeke úıdiń aýmaǵynan tabylǵan. Saraptama qortyndysyna sáıkes, mamandar 3 adamnyń da órtten qaıtys bolǵanyn joqqa shyǵardy.

Aleksandr Kanışev – sol bir qaraly túni órtten aman shyqqan jalǵyz adam. Sottalýshy oqıǵa bolǵan kúni áıeli men balalardy qyzyl jalynnan alyp shyqpaq bolǵanyn alǵa tartyp otyr. Alaıda aıyptaý qortyndysy men saraptamanyń nátıjesine sáıkes, ol súıiktisi men onyń qyzyn jáne inisin azaptap, tunshyqtyryp, órtep jibergen kórinedi. Biraq aıyptalýshy áli kúnge deıin kinásin moıyndamady.

– Men uıyqtap jatqanda úıde balalar bolǵan, áıelim tamaq daıyndap jatty. Múmkin asyǵyp, temekisin sóndirmegen bolar. Órt tutanǵanda óz ómirim úshin emes, olardyń ómiri úshin kóbirek ýaıymdadym. Biz onymen uzaq ýaqyt birge turýdy josparlap edik, – dedi sottalýshy Aleksandr Kanışev.

Al órtenip ketken baspana aıyptalýshynyń anasynyń úıi bolyp shyqty. Aleksandr azamattyq nekedegi áıeli jáne onyń bir jasar qyzymen jataqhanada turǵan.

– Olar meniń úıimde boldy. Sebebi kishi ulym Savelııge qaraıtyn. Savelıı odan basqa eshkimmen qalmaıtyn. Ol tek Alına jáne Sashamen otyrǵandy qalaıtyn. Ol oǵan aǵasy ári ákesi sııaqty boldy, – dedi sottalýshynyń anasy Oksana Sharaıa.

Saraptama nátıjesine sáıkes, birinshi 1 jastaǵy qyz kóz jumýy múmkin. Búldirshinnen bas súıekteriniń synýy men aýyr bas mı jaraqaty anyqtaldy. Tekseris 21 jastaǵy áıel órt pen kómirqyshqyl gazynan ýlanǵanyn kórsetti. Saraptama sottalýshynyń 4 jasar inisi de órtke deıin kóz jumǵan degen qorytyndy shyǵardy.

– Qatty eseńgirep, ne isterimdi de bilmeı qaldym. Bastapqy nusqasynda olar órtten ýlanyp qaıtys boldy degen, aqparatty qabyldaı bastaǵanymyzda, balam men nemeremdi óltirdi degendi estip, esim shyǵyp otyr, – dedi marqum A. Kotıashtyń anasy Nadejda Kotıash.

Jantúrshigerlik oqıǵanyń aldynda Aleksandrdyń dostarymen birge jataqhanada ishimdik ishkeni belgili boldy. Tipti shýǵa narazy bolyp, tynyshtyqty talap etken kórshilerimen de janjaldasqan.

Aıta keteıik, dúıim jurtty dúr silkindirgen is alqabıler sotynda qaralyp jatyr. Eger qazylar sottalýshyny biraýyzdan kináli dep tapsa, aıyptalýshy ómir boıyna bas bostandyǵynan aıyrylýy múmkin.