SQO-da úsh adamdy óltirdi dep aıyptalǵan kúdiktini alqabıler aqtap aldy

<p>PETROPAVL. KAZINFORM &ndash; Soltústik Qazaqstan oblysynyń Qylmystyq ister jónindegi mamandandyrylǵan aýdanaralyq sotynda alqabılerdiń qatysýymen úsh adamdy óltirdi jáne tonady dep aıyptalǵan K.-ǵa qatysty sot úkimi shyqty.&nbsp;</p>

SQO sotynyń málimetinshe, K.-ge mynandaı aıyp taǵylǵan:

2021 jylǵy 5 qarashada Petropavlda páterlerdiń birinde týǵan kúnde bolyp, M. degenniń kýrtkasynyń qaltasynan 20 myń teńge aqshasy bar ámııandy urlap ketken.

2023 jyldyń 5 qyrkúıeginde K. anasynyń úıinde ózimen azamattyq nekede birge turatyn K. A.-men janjaldasyp, ony óltirýge nıettenedi.

Aıyptaý qorytyndysy boıynsha, K. áıeliniń kishkentaı qyzyn kóterip, óz boıymen birdeı bıiktikten kireberistiń edenine alyp urǵan. Alǵan jaraqattarynan bala sol jerde qaıtys boldy. Ári qaraı aıyptalýshy áıeldiń qylmystyq jaýapkershilikke tartamyn degen qoqan-loqysynan qorqyp, ony óltirý úshin aýzy-murnyn jaýyp, tunshyqtyrǵan. Esinen tanyp qalǵan K. A.-ny óldi dep oılap, qolyn bosatqan.

Budan keıin ol oqıǵaǵa kýáger kámelet jasyna tolmaǵan inisi S.-ny da tunshyqtyryp óltirgen. 

K. úsh adamnyń ólimin jazataıym oqıǵa retinde kórsetip, óz qylmysyn jasyrý maqsatynda, A. es-tússiz kúıde jatqan kireberis bólmege ot qoıǵan. Saldarynan áıel ıis tıip, ýlanyp, kóz jumdy.

K. órttiń ózdiginen shyqqanyn kórsetý úshin úıdiń terezesin syndyryp, syrtqa shyǵyp, kómekke shaqyra bastaǵan.

Prokýror qylmystyq quqyq buzýshylyqtardyń jıyntyǵy boıynsha K.-ǵa ómir boıyna bas bostandyǵynan aıyrý túrindegi jaza taǵaıyndaýdy surady.

Qorǵaýshy tarap K.-ny aqtaýdy surady.

Alqabıler alqasynyń úkimimen K. kinásiz dep tanylyp, qylmys oqıǵasy bolmady dep aqtaldy.

«QR Qylmystyq kodeksiniń 191-babynyń 1-bóligi - tonaý, QR Qylmystyq kodeksiniń 99-baby 1, 3, 5-tarmaqtarynyń 2-bóligi - eki ne odan da kóp adamdy óltirý, kináli adamǵa dármensiz kúıde ekeni kórineý belgili adamdy, aıryqsha qatygezdikpen óltirý jáne QR Qylmystyq kodekstiń 99-babynyń 3-bólimi - jas balany óltirý boıynsha aıyptalǵan K. kinási dáleldengen joq. Onyń ústinen qozǵalǵan barlyq aıyp alynyp, sot zalynan bosatylsyn», - dedi SQO qylmystyq ister jónindegi mamandandyrylǵan aýdanaralyq sotttyń sýdıasy Dastan Ysmaılov.

Sondaı-aq K. zańsyz qylmystyq jaýapkershilikke tartylǵany úshin keltirilgen zııandy óndirip alýǵa quqyly dep tanyldy.

Úkim zańdy kúshine engen joq.

Buǵan deıin SQO-da alqabıler kásipkerden 50 mln teńge bopsalady dep aıyptalǵan blogerlerdi aqtaǵan edi.