SQO-da ýly hımıkatty jerge tókken sharýashylyq 1 mln astam teńge aıyppul tóleıdi

PETROPAVL. QazAqparat – Soltústik Qazaqstan oblysynda ekologııa departamenti Shal aqyn aýdanynda mamyr aıynyń sońynda jerge tógilgen ýly hımıkatqa qatysty tekseristi aıaqtady, dep habarlaıdy QazAqparat tilshisi.

Esterińizge salaıyq, maýsym aıynyń basynda áleýmettik jelide Shal aqyn aýdanynda 180 tonnadan astam ammıaktyń orman mańyna tógilgendigi týraly aqparat tarady. Beınejazbadan japyraqtyń sarǵaıyp ketkenin kórýge bolady.

SQO ákimi Aıdarbek Saparov bul jaǵdaıdy baqylaýǵa alyp, kinálilerdiń jazalanatynyn jetkizdi.

SQO ekologııa departamentiniń málimetinshe, osyǵan baılanysty «Asýl Farms» JShS-niń Shal aqyn aýdany Afanasevka eldi mekeninde ornalasqan nysanyna qatysty jospardan tys tekseris júrgizildi. Nátıjesinde birneshe zańbuzýshylyq anyqtaldy. Kásiporyn jerdi KAS-32 suıyq tyńaıtqyshymen ýlaǵan. Bul jaıynda qorshaǵan ortany qorǵaýǵa qatysty ýákiletti organdy der kezinde habardar etpegen. Zańǵa sáıkes mándetti memlekettik ekologııalyq saraptamany júrgizbegen.

Anyqtalǵan zań buzýshylyqtarǵa baılanysty «Asýl Farms» JShS ákimshilik jaýapqa tartylyp, 1 mln 121 myń teńge aıyppul tóleıtin boldy.

Sondaı-aq, «Asýl Farms» JShS qorshaǵan ortany qorǵaýǵa qatysty ýákiletti organmen remedıatsııa, ıaǵnı, tabıǵı qurylymyn qalpyna keltirý úshin arnaıy baǵdarlama jasap, ony bekitý qajettigi jóninde habarlama jiberildi.

QR Ákimshilik quqyq buzýshylyq týraly kodekstiń 337-babynyń 2-bóligi ekologııa departamentiniń quzyretine jatpaıtyndyǵyna baılanysty tekserý materıaldary QR zańnamasyna sáıkes tıisti sharalar qabyldaý úshin SQO jer resýrstaryn basqarý departamentine jiberildi.