SQO-da týý kórsetkishi qaıtys bolǵandar sanynan asa almaı keledi

<p>PETROPAVL. KAZINFORM &ndash; Soltústik Qazaqstan oblysynda qańtar aıyndaǵy kórsetkish boıynsha halyq sany 530,1 myń adamǵa jetti.</p>

Óńirdegi demografııalyq jaǵdaı jaıynda ulttyq statıstıka bıýrosynyń SQO boıynsha departamenti habardar etti.

Baspasóz qyzmetiniń málimetinshe, 270,8 myń adam nemese halyqtyń 51,1% aýylda turyp jatyr. 

Byltyr oblysta 5572 náreste dúnıege kelgen. Onyń 2848 — uldar, 2724 — qyzdar.

Jańa týǵan balalardyń 41,4% — Petropavl turǵyny.

Al aýdandar arasynda týý kórsetkishi boıynsha Ýálıhanov aýdany 16,09 promıllemen alda keledi. 

Eń tómen týý kórsetkishi M. Jumabaev aýdanynda — 9,12 promılle. 

Ótken bir jylda 5898 adam qaıtys boldy. 

Negizgi ólim sebepterinde qan aınalym júıesi aýrýlarynyń úlesi joǵary — 15,6% bolsa, 14,1% — tynys alý organdarynyń aýrýlary, 9,1% — as qorytý organdarynyń aýrýlary, 8,1% — qaterli isik jáne 7,1% jazataıym oqıǵalar, ýlaný men jaraqattaný alady. 

Byltyr óńirde 3126 juptyń nekesi tirkeldi.

Azamattyq hal aktilerin tirkeý organdarynyń derekteri boıynsha, nekeni buzý týraly sot sheshimderin eskerýsiz 674 otbasy ajyrasty.