SQO-da túrme aýlasyna uıaly telefondardy laqtyrmaq bolǵandar ustaldy

PETROPAVL. QazAqparat – Soltústik Qazaqstan oblysyndaǵy ES-164/3 mekemesiniń qyzmetkerleri kolonııaǵa tyıym salynǵan zattardy ótkizbek bolǵandardy anyqtady, dep habarlaıdy QazAqparat tilshisi.

SQO boıynsha Qylmystyq atqarý júıesi departamenti baspasóz qyzmetiniń málimetinshe, ES-164/3 mekemesiniń qyzmetkerleri mekemege irgeles aýmaqty patrýldeý kezinde kúdik týdyrǵan jeńil kólikti toqtatqan. «Vaz 21099» markaly avtokóliginde Qostanaı oblysynyń 4 azamaty bolǵan. Mekeme qyzmetkerleri jedel-tergeý tobyn shaqyryp, avtokólikti teksergen.

Kólikten mekeme aýmaǵyna kirgizýge tyıym salynǵan zattar tabyldy. «Nokia» markaly 7 telefon, «Samsung» markaly 1 smartfon, 7 zarıadtaý qurylǵysy jáne 7 «Beeline» sım kartasy tárkilendi. Bul zattar ES-164/3 mekemesiniń sottalǵandaryna arnalǵan.

«Bul jyl basynan SQO aýmaǵynda tirkelgen alǵashqy derek. Qostanaı oblysynyń turǵyndary tyıym salynǵan zattardy mekeme aýmaǵyna laqtyrmaq bolǵan. Quqyq buzýshylyqtyń bul túrine ákimshilik jaýapkershilik barlyǵyn eske salamyz. Eskertý jasalady nemese laqtyrmaq bolǵan zatty tárkileı otyryp, 10 AEK mólsherinde aıyppul salynady. Al esirtki zattaryn laqtyrýdy josparlaǵan adamdar qylmystyq jaýapkershilikke tartylýy múmkin», - deıdi SQO boıynsha QAJD bastyǵy Rýstan Ahmetjanov.