SQO-da túngi ýaqytqa páter jaldaǵan oqýshylardyń ata-anasy jazalandy

PETROPAVL. QazAqparat – Petropavlda 12-16 jastaǵy 13 jasóspirim áke-sheshesin aldap, kesh ótkizý úshin túngi ýaqytqa páter jaldamaq bolǵan. Olardyń ata-anasyna hattama toltyryldy, dep habarlaıdy QazAqparat tilshisi.

Soltústik Qazaqstan oblysy Polıtsııa departamenti baspasóz qyzmetiniń málimetinshe, Petropavldaǵy Amangeldi kóshesindegi kóppáterli úıdiń turǵyndary túngi saǵat 03.00 shamasynda polıtsııaǵa habarlasyp, jalǵa beriletin páterde kámelet jasqa tolmaǵan balalardyń bolýy múmkin ekendigin aıtqan.

Oqıǵa ornyna ıývenaldy polıtseıler baryp, qysqa merzimge jalǵa beriletin páterde 12-16 jas aralyǵyndaǵy 13 jasóspirim bolǵanyn anyqtady.
«Olardyń barlyǵy óz ata-analaryn týystarynda nemese dostarynda túneımiz dep aldaǵan. Tún ortasynda ata-analar balalaryn polıtsııa bóliminen alyp ketýge májbúr boldy. Kámeletke tolmaǵandardyń túngi ýaqytta úıden tys jerde bolýyna jol bergeni úshin olarǵa ákimshilik hattama toltyryldy», - deıdi tártip saqshylary.
Polıtseıler jumys kúnderi saǵat 22.00-den tańǵy 9.00-ge deıin, al demalys jáne mereke kúnderi saǵat 23.00-den 10.00-ge deıingi ýaqytta tynyshtyqty buzýǵa bolmaıtynyn eske salady. Zańdy buzǵan jeke tulǵalarǵa 5 AEK (1 AEK – 3450 teńge) mólsherinde aıyppul qarastyrylǵan.
Jyl basynan beri Petropavl qalasy boıynsha túngi tynyshtyqty buzýǵa qatysty polıtseılerge 500-ge jýyq qońyraý túsken. Sonyń úshten birinde tártip jalǵa beriletin páterlerde buzylǵan.