SQO-da týǵannan beri bir de bir qujaty bolmaǵan 30 jastaǵy áıel jeke kýálik aldy

PETROPAVL. QazAqparat – Soltústik Qazaqstan oblysynda bıyl qujatsyz júrgen 237 adam anyqtalsa, sonyń 65-ine jeke kýálik jasaldy, dep habarlaıdy QazAqparat tilshisi.

SQO óńirlik kommýnıkatsııalar qyzmetinde «qujatsyz júrgen azamattardyń quqyqtyq mártebesin retteý» taqyrybynda brıfıng ótti. SQO Polıtsııa departamenti Kóshi-qon qyzmeti basqarmasynyń bastyǵy Talǵat Ábilevtiń aıtýynsha, óńirde sońǵy bes jylda qujatsyz júrgen 1611 adam anyqtalǵan. Olarǵa quqyqtyq kómek kórsetilip, barlyǵy qujattandyryldy. Atqarylyp jatqan jumystardyń nátıjesinde qujatsyz júrgenderdiń qatary sıregen.

«M.Jumabaev aýdanynyń 30 jastaǵy turǵyny kóshi-qon qyzmetine qujat jasatý boıynsha habarlasty. Onyń ózimen bir de bir qujaty, tipti týǵany týraly aktilik jazbadan bastap, týý týraly kýáligine deıin bolmaǵan. Áıel bizge habarlasqan kezde onyń týǵany týraly esh derek anyqtalmady.

Adam quqyqtary jónindegi bıýromen birlese kóp jumys atqaryldy. Barlyq ınstantsııalarǵa júgindik. Onyń týǵanyn rastaıtyn derek bolýy úshin qymbat turatyn molekýlıarlyq genetıkalyq saraptama jasaý qajet boldy. Bul protsedýra shamamen 300 myń teńgeden artyq turady. Bul shyǵyndardy Adam quqyqtary jónindegi bıýro kóterdi. Nátıjesinde áıel ómirinde alǵash ret jeke kýáligin aldy jáne Qazaqstan azamaty dep tanyldy», - deıdi Talǵat Ábilev.

Basqarma bastyǵynyń aıtýynsha, mundaı oqıǵalar óte kóp kezdesedi. Jeke kýáligi joq adamdardyń kópshiligi aýyldyq jerlerde turady. Olar mektepti bitirisimen oqýlaryn jalǵastyrmaıdy, jumys istemeıdi. Zeınetkerlikke shyǵar kezde ǵana nemese qandaı da bir járdemaqyny alarda qujatqa qajettilik týyndaıdy eken.

«Qujatyńyz joq bolsa, ony alýdan qoryqpaý kerek. Ár másele jeke-dara qaralady. Eshkim sizdi kóp ýaqyt qujatsyz júrgenińiz úshin sottamaıdy. Polıtsııa qyzmetkerleri túsinistikpen qarap, qujat alýyńyzǵa barynsha kómektesedi. Ár aýdanda bizdiń qyzmetkerlerimiz bar, olar aptanyń jumys kúnderi qabyldaıdy», - deıdi Kóshi-qon qyzmeti basqarmasynyń bastyǵy Talǵat Ábilev.

Qujatsyz júrgen adamdardy anyqtaý maqsatynda polıtsııa qyzmetkerleri «Ýchastok» jedel-profılaktıkalyq is-sharasyn ótkizedi. Jyl basynan SQO-da osyndaı 237 adam anyqtaldy. Olardyń 111-i el aýmaǵynda týý týraly kýálikpen turyp kelgen. 74 adam keńes dáýirindegi tólqujattarmen júrgen. Qalǵandarynyń qolynda týǵany týraly aktilik jazba ǵana bolǵan.

Bıyl SQO-da qujatsyz júrgen 65 adam jeke kýálik aldy.