SQO-da týǵandar sanynan qaıtys bolǵandar úlesi basym

PETROPAVL. QazAqparat – Soltústik Qazaqstan oblysynda jarty jylda 2791 náreste dúnıege kelse, osy aralyqta 2923 adam qaıtys bolǵan, dep habarlaıdy QazAqparat tilshisi.

Ulttyq statıstıka bıýrosynyń SQO boıynsha departamentiniń málimetinshe, bıylǵy 1 shildedegi jaǵdaıǵa sáıkes oblysta 532,7 myń adam turady. Onyń ishinde 48,7% qalalyqtar, bul – 259,3 myń adam, aýyldyqtardyń úlesi 51,3% nemese 273,4 myń adam.

Bıyl qańtar-maýsym ishinde 2791 náreste dúnıege keldi. Olardyń ishinde 1420-si – ul, 1371-i - qyz. Nárestelerdiń 41,9% oblys ortalyǵynda týǵan.

Oblys aýdandary arasynda eń joǵary týý koeffıtsıenti Ýálıhanov, Aqjar, Mamlıýt jáne Taıynsha aýdandarynda. Oblys boıynsha eń tómen týý kórsetkishi Esil, Tımırıazev jáne Aqqaıyń aýdandarynda tirkelgen.

2023 jyldyń qańtar-maýsymynda 2923 adam qaıtys boldy. Halyqtyń negizgi ólim sebepteri arasynda 16,9% - qan aınalymy júıesiniń aýrýlary, 14,3% -tynys alý organdarynyń aýrýlary, 8,6% - as qorytý organdarynyń aýrýlary, 8,2% - jańa óskinder, 6,4% - jazataıym oqıǵalar, ýlaný men jaraqattaný alady.

Ólim-jitim koeffıtsıenti oblys boıynsha 11,06 promılle.

Jarty jylda óńirde 1380 neke tirkeldi. Azamattyq hal aktilerin tirkeý organdarynyń derekteri boıynsha, nekeni buzý týraly sot sheshiminsiz 310 jup ajyrasyp ketti.