SQO-da «Týǵan jer» baǵdarlamasyna 200-ge jýyq kásipker qatysty

PETROPAVL. QazAqparat - Soltústik Qazaqstan oblysynda «Týǵan jer» baǵdarlamasyna 200-ge jýyq kásipker qatysyp, óńirdiń kóptegen áleýmettik máseleleri sheshimin tapty, dep habarlaıdy QazAqparat tilshisi.

Elbasy N. Nazarbaevtyń «Bolashaqqa baǵdar: rýhanı jańǵyrý» atty baǵdarlamalyq maqalasy jaryqqa shyqqaly Qyzyljar óńirinde bıznestiń qatysýymen 224 áleýmettik joba júzege asqan. Jumsalǵan qarajat - 2,6 mlrd teńge shamasynda.

Kásipkerler kindik qany tamǵan týǵan jerge degen qurmetin, otansúıgishtigin sózben emes, ispen dáleldedi. Nátıjesinde eldi mekenderde jańa sporttyq-saýyqtyrý keshenderi, arhıtektýralyq-monýmentaldy eskertkishter paıda boldy. Baǵdarlama aıasynda aýlalar abbattandyrylyp, saıabaqtar kóbeıdi.

SQO Kásipkerlik jáne týrızm basqarmasynyń málimetinshe, byltyr óńirde 1, 436 mlrd teńgeniń 98 jobasy júzege asty. Metsenattardyń qarajatyna 19 mektep, 12 mádenı ortalyq, 3 sport zaly kúrdeli jóndeldi. Budan basqa 3 sport alańy jáne mádenı ortalyq salynyp, paıdalanýǵa berildi.

Qazirgi tańda baǵdarlamaǵa qatysýǵa 100 jeke kásipker, 60 sharýa qojalyǵy, iri jáne orta bıznestiń 27 sýbektisi tilek bildirgen.

Aýylynyń ósip, órkendeýine, gúldenýine súbeli úles qosqandardyń biri - Aqqaıyń aýdanyndaǵy «Daıyndyq» JShS dırektory Birjan Sháımerdenov. Birjan Ábdilmanuly eginshilik pen mal sharýashylyǵyn damytýmen qatar aýyldyń áleýmettik máselesin sheshýge de úlken kóńil bóledi.

Búginde Daıyndyq aýylyndaǵy barlyq úıler ortalyq jylytý júıesine qosylǵan, sý úıge kirip tur. Eldi mekende kásipkerdiń kómegimen balabaqsha, emdeý mekemesi boı kóterdi. Jylda aýyl turǵyndary men jas jumysshylarǵa turǵyn úıler salynady. Byltyr ol aýylyna mektep salyp berdi.

«Ortaq Otanymyzdyń gúldenýine súbeli úles qosyp júrgen júregi jomart jandar aýyldastarynyń, turǵyndardyń alǵysyna bólenip júr. Osy jerde erekshe atap ketetin jaıt - rýhanı jańǵyrýdy tek metsenattardyń esebinen túrli jobalardy qarjylandyrý, nysandar salý dep birjaqty qarastyrýǵa bolmaıdy. Rýhanı jańǵyrý - ár adamnyń óziniń kórkem minez-qulqynan, otbasyndaǵy tálim-tárbıesinen bastaý alýy kerek», - deıdi SQO boıynsha «Rýhanı jańǵyrý» jobalaý keńsesiniń jetekshisi Janar Talaspaeva.

«Atameken» kishi baǵdarlamasyn júzege asyrýǵa qosqan erekshe úlesi úshin «Jomart Júrek - 2018» baıqaýynda oblystyń 5 metsenaty marapatqa ıe boldy. Birjan Sháımerdenov oblystyq jáne respýblıkalyq deńgeıde «Jyl tulǵasy» atandy.

SQO Kásipkerlik jáne týrızm basqarmasy mamandarynyń aıtýynsha, bıylǵa osy baǵdarlama aıasynda 944,3 mln teńgeniń irili-usaqty 80 jobasy josparlanǵan.