SQO-da traktorıst-mashınıst kýálikterin zańsyz berý faktileri anyqtaldy

<p>PETROPAVL. KAZINFORM &ndash; Soltústik Qazaqstan oblysynda prokýrorlardyń tekserisi barysynda 14 adamǵa aýyl sharýashylyǵy kóligin júrgizý kýáligi zańsyz berilgeni anyqtaldy.</p>

SQO prokýratýrasynyń málimetinshe, zańnama talaptaryn óreskel buzý faktileri jol qozǵalysy qaýipsizdigi salasyndaǵy zań buzýshylyqtardy anyqtaý jáne olardyń jolyn kesý boıynsha júrgizilgen jumys barysynda anyqtalǵan. 

Ǵ.Músirepov atyndaǵy aýdannyń aýyl sharýashylyǵy bóliminiń laýazymdy tulǵasy aýdandyq sottyń byltyr tamyz aıyndaǵy qaýlysyn esepke almaı, kólik quraldaryn basqarý quqyǵynan aıyrylǵan «B» esimdi adamǵa osy jyldyń sáýir aıynda traktorshy-mashınıst kýáligin zańsyz bergen.

Osyǵan uqsas zań buzýshylyqtar Aıyrtaý, Esil, Qyzyljar, Mamlıýt, Shal aqyn, Tımırıazev, Ýálıhanov aýdandarynyń jáne Petropavl qalasynyń aýyl sharýashylyǵy bólimderinde anyqtaldy.

Prokýrorlyq qadaǵalaý aktisi boıynsha zańsyzdyqqa jol bergen laýazymdy tulǵalar jaýapkershilikke tartylyp, 2 traktorıst-mashınıst kýálikteri ýákiletti organ tarapynan tárkilenip, joıyldy.

Qalǵan 12 kýálikti jaramsyz dep taný boıynsha jumystar júrgizilip jatyr. 

Buǵan deıin SQO prokýrorlary alıment tóleı almaı júrip, qumar oıynǵa qomaqty qarjy salǵandardy anyqtaǵanyn jazǵan edik.