SQO-da tórt adamnan metapnevmovırýs anyqtaldy

<p>PETROPAVL. KAZINFORM &ndash;&nbsp; Soltústik Qazaqstan oblysynda metapnevmovırýsty tórt adam juqtyrdy.</p>

SQO Sanıtarııalyq-epıdemıologııalyq baqylaý departamenti baspasóz qyzmetiniń málimetinshe, metapnevmovırýs jiti respıratorlyq vırýstyq ınfektsııalarǵa jatady.

Adam metapnevmovırýsy – kóptegen elde burynnan taralǵan klassıkalyq vırýstardyń biri. Bul vırýstyń shtamdary Qazaqstanda JRVI jáne tumaý aýrýlarynyń maýsymdyq ósýi kezeńinde ınfektsııalardyń basqa túrlerimen qatar anyqtaldy.

Máselen, epıdemııalyq maýsymnyń basynan oblysta rınovırýstardyń 34 jaǵdaıy, adenovırýstardyń 28, paragrıpptiń -23, bokavırýstardyń 5, metapnevmovırýstardyń 4 jáne koronavırýstardyń 3 jaǵdaıy tirkelgen.

Mamandardyń aıtýynsha, metapnevmovırýs negizinen aýa arqyly taralady. Infektsııanyń negizgi belgileri – jótel, murynnan sý aǵý, entigý, tyrysý, bas aýrýy. Naqty emdeý joly joq, sımptomatıkalyq emdeý qoldanylady.

Qazirgi ýaqytta búkil álem sııaqty Qazaqstanda da JRVI jáne tumaýmen aýyrýdyń maýsymdyq ósýi tirkelgen. Sanıtar dárigerler aýrýdyń aldyn alý úshin adamdar kóp jınalatyn jerlerge barmaýǵa keńes beredi. Bul ásirese sozylmaly aýrýlary bar jandarǵa qatysty.

Sondaı-aq úı-jaılardy únemi jeldetý, qoldy tazartý úshin antıseptıkterdi nemese dezınfektsııalyq maılyqtardy qoldaný, aýrý adamdarmen baılanysty shekteý, olardyń oqshaýlanýyn qamtamasyz etý qajet.

Al aýrý belgileri paıda bolǵan jaǵdaıda dárigerge kórinip, em alǵan jón.

Buǵan deıin QR Densaýlyq saqtaý mınıstrligi metapnevmovırýstyń taralýyna baılanysty úndeý joldaǵanyn jazǵan edik.