SQO-da topyraqtyń sapasyn anyqtaıtyn agrohımııalyq zerthana ashyldy
«Agro lab» JShS Petropavlda jobany júzege asyrý úshin 600 mln teńge ınvestıtsııa quıdy. Bul – halyqaralyq úlgimen topyraqtyń quramyn tolyq taldap beretin elimizdegi alǵashqy agrohımııalyq zerthana. Jańa nysannyń ashylý rásimine QR AShM Jer resýrstaryn basqarý komıtetiniń tóraǵasy Gúljahan Bımendına jáne oblys ákiminiń birinshi orynbasary Marat Tasmaǵanbetov qatysty.
«Qazir óńirde sapa kórsetkishin arttyrýǵa basymdyq berdik. Egistik alqaptaryn ártaraptandyryp jatyrmyz. Bıyl 1 mln astam gektarǵa maıly daqyldar sebildi. Bıyl «Soltústik soıasy» atty qanatqaqty joba qolǵa alyndy. 20 myń gektarǵa soıa egilse, kelesi jyly bul kórsetkishti 5 ese arttyrmaqpyz. Ashylǵan zerthana topyraq saraptamasyn jasap, agrarıılerdiń jumysyn jeńildetpek», - dedi zerthananyń ashylý saltanatynda sóz alǵan SQO ákiminiń birinshi orynbasary Marat Tasmaǵanbetov.
Jańa zerthanaǵa gollandııalyq qondyrǵy ornatylǵan. Jergilikti turǵyndardan 20 adam jumyspen qamtyldy. Olar bir táýlikte 280 saraptama jasaı alady. Sharýalar endi zerthana arqyly alqaptarynyń quramyndaǵy qunarly zattardyń, mıneraldardyń mólsherin anyqtaıdy, tıisinshe qajetti tyńaıtqyshtardy qoldaný boıynsha mamandardyń keńesin alady.
«Bizdiń zerthana zamanaýı apparattardy qoldanady. Topyraqtyń 6 negizgi kórsetkishi boıynsha zertteý júrgizemiz. Atap aıtsaq PH deńgeıin, quramyndaǵy gýmýs mólsherin, kúkirt, azot, fosfor men kalııdiń mólsherin baıqaımyz. Bul topyraqtyń qunaryn saqtaýǵa jáne mol ónim alýǵa septigin tıgizedi», - deıdi agrohımııalyq zerthananyń meńgerýshisi Almagúl Qalıasqarova.
Zerthana óz tutynýshylaryna ár ýchaske jaıly tolyq maǵlumat beretin kartogramma jasap beredi. Bul qujatty sharýalar memleketten mıneraldy tyńaıtqyshtarǵa sýbsıdııa alar kezde qoldana alady.