SQO-da terrorızmge qarsy qorǵanysy álsiz 245 nysan tekserildi

PETROPAVL. QazAqparat – Soltústik Qazaqstan oblysynda polıtseıler terrorıstik turǵydan osal 245 nysandy tekserip, ondaǵy olqylyqtardy joıýǵa 80 uıǵarym shyǵardy, dep habarlaıdy QazAqparat tilshisi.

SQO Polıtsııa departamenti baspasóz qyzmetiniń málimetinshe, jyl basynan beri Ekstremızmge qarsy is-qımyl basqarmasynyń qyzmetkerleri terrorıstik turǵydan osal 245 obektini anyqtaǵan. Onyń 174-i adamdar kóp jınalatyn nysandar. Tekseris nátıjesi boıynsha anyqtalǵan olqylyqtardy joıý týraly 80 uıǵarym shyǵaryldy. Terrorızmge qarsy qorǵanysty qamtamasyz etpegen jáne qaýipsizdiktiń tıisti deńgeıin saqtamaǵan 5 laýazymdy tulǵa ákimshilik jaýapqa tartyldy.

«Terrorızmge qarsy zańnamaǵa ózgerister engizilgen. Endi belgilengen talaptarǵa saı keletin obektiler eki jylda bir ret tekseriledi. «Kezekti» jáne «jospardan tys» tekseris uǵymdary engizildi, atalǵan tekserister terrorıstik qaýip deńgeıi jarııalanǵan jaǵdaıda, sondaı-aq buryn anyqtalǵan olqylyqtardyń joıylýyn qaıta tekserý maqsatymen ótkiziledi. Zań boıynsha terrorızmge qarsy qorǵalý júıesindegi kemshilikterdi joıýǵa beriletin merzim bir jylǵa uzartyldy», - deıdi SQO PD Ekstremızmge qarsy is-qımyl basqarmasynyń bastyǵy Rýslan Jarasbaev.

Basqarma bastyǵynyń aıtýynsha, nysandardyń basshylary burynǵydaı terrorızmge qarsy qorǵanysqa qarajat qarastyrýǵa, ózderiniń personalymen oqý jáne aldyn alý is-sharalaryn uıymdastyrýǵa, terrorızm aktilerine den qoıý máseleleri boıynsha ýákiletti memlekettik organdarmen, jedel shtabtarmen ótkiziletin is-sharalarǵa qatysýǵa mindetti.

SQO aýmaǵynda terrorıstik turǵydan osal 577 obekti tizimge engizilgen. Onyń 437-si halyq kóp jınalatyn nysandar.