SQO-da terrorızm úshin sottalǵan 32 adam jazasyn ótep jatyr

PETROPAVL. QazAqparat – Soltústik Qazaqstan oblysy qylmystyq-atqarý júıesi departamenti, din isteri basqarmasy, «Qyzyljar» ortalyq meshiti jáne Qazaqstan Pravoslav shirkeýiniń Petropavl jáne Býlaev eparhııasy memorandýmǵa otyrdy. Maqsat – terrorızm úshin sottalǵandardy durys jolǵa baǵyttaý, dep habarlaıdy QazAqparat tilshisi.

SQO QAJD baspasóz qyzmetiniń málimetinshe, memorandýmǵa otyrýdyń basty maqsaty - sottalǵandarmen teologııalyq, ońaltý jumystaryn maqsatty túrde uıymdastyrý. Taraptar arasyndaǵy yntymaqtastyq jazasyn óteýshilerdi durys jolǵa salýǵa baǵyttalǵan.

Qazirgi ýaqytta SQO qylmystyq-atqarý júıesi departamentiniń mekemelerinde terrorızm úshin sottalǵan 32 adam jazasyn ótep jatyr. Ekeýi – áıel. Jasaǵan qylmysyna baılanysty olar 6 jyldan 15 jylǵa deıin sottalǵan.

Sanasy ýlanyp, teris jolǵa túskenderdi tezge salýǵa endi din qyzmetkerleri de úles qospaq. Túrmede júrgiziletin tárbıe jumysy júıeli túrde jolǵa qoıylmaq.

«Radıkaldy, destrýktıvti dinı ıdeologııanyń taralýynyń aldyn alý boıynsha sottalǵandarmen jumys uıymdastyrylady. Memorandým aıasynda bekitilgen kestege sáıkes dinı qyzmetkerler mekemelerge kelip, dinı saýattylyqty arttyrýǵa baǵyttalǵan is-sharalar ótkizedi. Qylmystyq-atqarý júıesi organdaryna odan ári jumysqa ornalastyrý úshin teologtardy, dintanýshylardy irikteý boıynsha úgit-nasıhat jumystaryna járdemdesedi. Din qyzmetkerleri basqalarǵa qaraǵanda sottalǵandarǵa kóbirek áser etetini sózsiz, sondyqtan mundaı jumysty ýaqytynda júrgizý óte mańyzdy.

Al biz óz tarapymyzdan dinı ekstremızm men terrorızmniń aldyn alý jónindegi is-sharalarǵa qatysyp, járdem beremiz», - deıdi SQO QAJD bastyǵy Berik Bılıalov.