SQO-da terrorıstik shabýylǵa qorǵanysy osal 600-ge jýyq obekti bar
SQO Polıtsııa departamenti baspasóz qyzmetiniń habarlaýynsha, óńirde terrorıstik shabýyl turǵysynan osal 600-deı nysan bar. Jyl basynan olardyń 506-sy tekserildi. Zańnamany tıisti deńgeıde oryndamaǵan 24 obektiniń jetekshisi ákimshilik jaýapqa tartylyp, aıyppul tóledi.
«Terrorıstik turǵydan osal obektilerdiń qatarynda halyq kóp jınalatyn, asa mańyzdy memlekettik, strategııalyq jáne qaýipti óndiristik nysandar bar. Bul obektilerdiń jetekshileri zańnamaǵa sáıkes, sonyń ishinde tehnıkalyq reglamenttelgen quraldar arqyly qaýipsizdikti qamtamasyz etýleri kerek. Halyq kóp shoǵyrlanǵan nysandar beınebaqylaý júıesi arqyly qadaǵalanyp, jazbasy eń keminde 30 táýlik saqtalýy tıis. Budan basqa tótenshe jaǵdaı týǵanda habardar etetin shuǵyl qulaqtanyrý júıesi, kúzettik jaryqtandyrý jáne órt-kúzet dabylqaqqyshy bolýy qajet», - deıdi SQO PD ekstremızmge qarsy áreket basqarmasy bastyǵynyń orynbasary Spartak Qabdenov.
Onyń sózine qaraǵanda, taǵy bir basty talaptardyń biri - kúzetiletin nysandarda qatań ruqsatnamalyq tártipti saqtaý. Strategııalyq, asa mańyzdy jáne qaýipti óndiristik nysandardyń ınjenerlik-tehnıkalyq bekinisterine qosymsha talaptar qoıylady. Mundaı nysandardyń basshylary ózderine bekitilgen nysandardyń qaýipsizdigin qamtamasyz etý úshin jyl saıyn qarjy bólip otyrýy kerek.
Tekseristiń qorytyndysy boıynsha, ǵımarattardyń jetkiliksiz deńgeıde tehnıkalyq quraldarmen jaraqtandyrylýy, personalmen lańkestikke qarsy oqý-jattyǵýlardyń ótkizilmeýi – jıi kezdesetin olqylyqtar esebinde. Oblysta terrorızmge qarsy zańnamany tıisti deńgeıde oryndamaǵandarǵa jyl basynan 156 uıǵarym berildi.