SQO-da telemedıtsına salasyna qatysty qanatqaqty joba iske qosyldy
SQO Densaýlyq saqtaý basqarmasy baspasóz qyzmetiniń málimetinshe, jobany júzege asyrý úshin 2023 jyldyń maýsymynda Frantsııa úkimeti 650 myń eýro kóleminde grant bóldi. Baǵdarlama aýyl turǵyndary úshin beıindi medıtsına mamandardyń keńesi qoljetimdi bolýyn maqsat etken.
Frantsýz telemedıtsınalyq jabdyqtaryn saltanatty túrde paıdalanýǵa berý is-sharasyna Densaýlyq saqtaý mınıstri Ajar Ǵınııat pen oblys ákimi Gaýez Nurmuhambetov qatysty.
«Aýyldyq jerlerde dárigerlerdiń jetispeýine baılanysty osyndaı qashyqtyqtan kórsetiletin medıtsınalyq kómektiń túrlerin, telemedıtsınany damytý qolǵa alyndy. Densaýlyq salasyn damytýda nátıjesi bolsa, bul jobalar ary qaraı taratylady», - dedi mınıstr.
QR Prezıdentiniń «Ádiletti Qazaqstan: bárimiz jáne árqaısymyz úshin. Qazir jáne árdaıym» saılaýaldy baǵdarlamasynyń 101-tarmaǵyn iske asyrý aıasynda medıtsınalyq qyzmetterge qoljetimdilikti keńeıtý týraly SQO ákimdigi men «C3 Medical» frantsýz kompanııasy arasynda memorandým jasaldy.
Frantsýzdyq «S3 Medical jáne HopiMedical kompanııalary jobaǵa qajet jabdyqtardy jetkizdi. Nátıjesinde SQO-nyń shalǵaıdaǵy 16 emdeý mekemesine 16 limstar telekonsýltatsııalyq arbasyn jáne olarmen baılanysty dıagnostıkalyq aspaptardy ornatty.
Endi aýyl dárigerleri Petropavl qalasynyń eki oblystyq kópsalaly aýrýhanasynyń beıindi dárigerlerimen medıtsınalyq keńes alý úshin baılanysqa shyǵa alady. Bul tehnologııany 115 myńnan astam aýyl turǵyndary paıdalana alady.
Qondyrǵy joǵary sapadaǵy beıne rejımde keńeıtilgen klınıkalyq tekserý júrgizýge múmkindik beredi. Ol EKG, ýltradybystyq skaner, dermataskop, qol kamerasy, otoskop jáne stetoskop sııaqty ártúrli medıtsınalyq datchıktermen jabdyqtalǵan.
Joba aıasynda medıtsınalyq jáne feldsherlik brıgadalar qoldaý taýyp, bilimderin jetildirmek.