SQO-da tekserýshiler memqyzmetshiler tarapynan dórekilikke tap boldy
Jaǵdaı neǵurlym anyq bolýy úshin «jasyryn satyp alýshy» ádisi qoldanylady. Keńes hatshylyǵynyń etıka boıynsha meńgerýshisi, memlekettik qyzmet isteri jáne sybaılas jemqorlyqqa qarsy is-qımyl departamenti basshysynyń orynbasary Janat Jumabaev jaqynda psıhıkalyq-nevrologııalyq aýrýhanany teksergenderin aıtty.
«Monıtorıng barysynda jol kórsetkishterdiń joqtyǵy, sapasyz qyzmet jáne qyzmet alýshylarǵa dóreki sóıleý syndy oqıǵalar tirkelgen. Eńbek, áleýmettik qorǵaý, kóshi-qon departamentinde «Múgedektikti jáne/nemese eńbek etý qabiletinen aıyrylý dárejesin belgileý jáne/nemese qajetti áleýmettik qoldaý sharalaryn aıqyndaý» memlekettik qyzmettiń túrine júginý barysynda «jasyryn satyp alýshylar» dórekilikke tap bolǵan», - dedi J.Jumabaev.
Onyń aıtýynsha, tekseris jasap júrgen adamdar keńes ala almaǵan, al departament qyzmetkerleri óreskel minez kórsetken.
Petropavl qalasyndaǵy №2 HKO-da tirkeý ornynyń qyzmetkeri «Azamattardy áskerı-tehnıkalyq jáne ózge de áskerı mamandyqtarǵa daıyndaý» túrindegi memlekettik qyzmetti berýdiń tártibin bilmeı, qajet qujattar tizimi týraly teris aqparat usynyp, ary qaraı tolyq maǵlumatty alý úshin áskerı komessarıatqa barýǵa keńes bergen.
«Esil jáne Tımırıazev aýdandarynyń qorǵanys isteri jónindegi bólimderinde múmkindigi shekteýli jandarǵa jaǵdaı qarastyrylmaǵan, qyzmetkerlerdiń biryńǵaı kıim formasy, beıdjderi joq. Tımırıazev aýdanyndaǵy bólimde kelýshilerge arnalǵan aqparattyq stendter bolmaǵan», - dedi J.Jumabaev.