SQO-da Táýelsizdik kúni qarsańynda 40 astam jańa nysan paıdalanýǵa berilmek

PETROPAVL. QazAqparat – Soltústik Qazaqstan oblysynda Táýelsizdik kúni merekesine oraılastyrylyp áleýmettik mańyzy bar birneshe jańa nysan paıdalanýǵa berilmek, dep habarlaıdy QazAqparat tilshisi.

SQO ishki saıasat basqarmasynyń málimetinshe, osy kúnderi oblystyń ár aýdanynda jańa nysandar qoldanysqa berilip jatyr. Máselen búgin Aqqaıyń aýdanynyń Poltavka eldi mekeninde jańa medıtsınalyq pýnkt esigin aıqara ashsa, Qııaly aýylynda mektep janynan shaǵyn ortalyq qurylyp, búldirshinderdi qabyldady.

Aldaǵy kúnderi óńirdiń eldi mekenderinde birneshe dúken, balabaqshalar men monshalar, atele, shashtaraz, naýbaıhana, dámhanalar paıdalanýǵa beriledi. Jańa nysandardyń qoldanysqa enýimen turaqty jumys oryndary da paıda bolmaq. Esil aýdanyndaǵy Zagradovka eldi mekeninde 400 iri qaraǵa arnalǵan mal kesheni, Tımırıazev aýdanynda qus fermasy salyndy.

Petropavl qalasynda Bereke, 19-shy shaǵyn aýdandarda 100 páterli jáne 79 páterli eki kóp qabatty úıdiń turǵyndary Táýelsizdik kúni merekesimen qatar qonys toıyn da toılamaq. Jalpy aldaǵy kúnderi óńirde 40-tan astam jańa nysan paıdalanýǵa berilmek.

Sondaı-aq jospar boıynsha 14 jeltoqsan kúni oblys ortalyǵynda aýyl sharýashylyǵy jármeńkesi ótip, turǵyndar kókónis, et-sút ónimderin, balyq pen bal sııaqty azyq-túlikti arzan baǵaǵa satyp alýǵa múmkindik alady.

Mereke kúnderi teatrlarda spektaklder men kontserttik baǵdarlamalar ótedi. 13 jeltoqsanǵa «Tańsholpan» qazaq mádenıetiniń oblystyq festıvali josparlanǵan. Al salamatty ómir saltyn ustanatyndar tórt kún demalysta Borkı kentinde shańǵy teýip, sporttyń osy túrinen jasóspirimder arasynda ótetin oblystyq týrnırdi tamashalaı alady.