SQO-da talap buzǵan ýly hımıkat qoıma ıelerine aıyppul salyndy

PETROPAVL. QazAqparat – Soltústik Qazaqstan oblysynda byltyr ýly hımıkattar qoımalaryna 11 tekserý júrgizilip, nátıjesinde tıisti talapty buzǵandarǵa jalpy somasy 2 mln teńgege jýyq aıyppul salyndy, dep habarlaıdy QazAqparat tilshisi.

SQO sanıtarııalyq-epıdemıologııalyq baqylaý departamenti baspasóz qyzmetiniń málimetinshe, byltyr pestıtsıd pen mıneraldy tyńaıtqyshtardy ýaqytsha saqtaýǵa arnalǵan 38 qoıma memlekettik sanıtarııalyq qadaǵalaý organdarynyń baqylaýynda boldy.

Adamdardyń ýlanýyna jol bermeý maqsatynda ýly hımıkat qoımalaryna 11 tekserý júrgizildi.

Tıisti talaptardyń saqtalmaǵany anyqtalyp, jalpy somasy 2 mln teńgege 4 ákimshilik aıyppul salyndy, barlyǵy óndirilip alyndy.

«Budan basqa 4 nusqama daıyndaldy, onyń 3-i merziminde oryndaldy. Uıǵarymdy oryndamaǵany úshin bir JShS-ge aıyppul salyndy, sotqa berildi, sot sheshimimen zańdy tulǵa 200 AEK - 612 myń teńge mólsherinde ákimshilik jaýapkershilikke tartyldy», - deıdi SQO sanıtarııalyq-epıdemıologııalyq baqylaý departamentiniń ónerkásiptik, radıatsııalyq qaýipti obektilerdi baqylaý jáne qadaǵalaý bóliminiń bas mamany Galına Statsıýk.

Mamannyń aıtýynsha, oblysta byltyr el aýmaǵynda ruqsat etilgen 300-den astam ataýdaǵy ýly hımıkattar qoldanyldy.

Profılaktıkalyq jumystardyń nátıjesinde pestıtsıdten ýlaný jaǵdaılary boıynsha medıtsınalyq uıymdardan habar túsken joq.

«Alda kóktemgi dala jumystary kele jatyr. Maýsymdyq óńdeý júrgizý kezinde ýly hımıkattarmen ýlanýdy boldyrmaý úshin sanıtarııalyq-gıgıenalyq normalardy, qaýipsizdik erejelerin saqtaǵan jón.

Ýly hımıkatpen jumysqa 18 jasqa tolǵan, medıtsınalyq tekserýden ótken jáne ruqsat berilgen adamdar jiberiledi. Emizetin jáne júkti áıelderdi, jasóspirimderdi jáne jazylmaıtyn jaralary bar adamdardy jumysqa tartýǵa tyıym salynady.

Sharýashylyq basshylary jumys isteıtinderdiń barlyǵyn arnaıy qorǵanys kıimimen qamtamasyz etýge tıis. Olardy qaıta-qaıta zalalsyzdandyryp otyrý kerek.

Ýmen jumys istegende temeki shegýge, tamaq ishýge tyıym salynady.

Jumys aıaqtalǵannan keıin jumysshylar qolyn sabynmen muqııat jýyp, shańdy ýmen jumys istegennen keıin qulaǵyn, moınyn jýyp, aýzyn shaıýy kerek.

Paıdalanylmaǵan ýdyń qaldyqtaryn qoımaǵa tapsyrý qajet.

Jumys ornynda alǵashqy kómek kórsetý úshin ýly hımıkattarmen ýlanǵan jaǵdaılarda qajetti kómek kórsetý quraldarynyń jıyntyǵy bar dári qobdıshasy bolýy tıis.

Ýly hımıkatpen birge adamdardy, sondaı-aq tamaq jáne jem ónimderin tasymaldaýǵa úzildi-kesildi tyıym salynady.

Ýly hımıkattardy tasymaldaǵannan keıin kólikter muqııat tazalanyp, zalalsyzdandyrylýy kerek.

Mehanızatorlar ýly hımıkattarmen jumys istemes buryn erejeler, saqtyq sharalary týraly tanysýy tıis», - deıdi Galına Statsıýk.

Mamannyń aıtýynsha, ýly hımıkattan ýlanǵan kezde adam qusady, júrek aınyp, bas jáne ish aýyrady. Tynys alýy jáne júrek qyzmeti buzylady.

Ýlanýdyń alǵashqy belgilerinde birden jedel járdem shaqyrý qajet.