SQO-da sybaılas jemqorlyq týraly habarlaǵandarǵa bıyl 700 myń teńgege jýyq syıaqy berildi

PETROPAVL. QazAqparat – Soltústik Qazaqstan oblysynda bıyl sybaılas jemqorlyq faktisi týraly habarlaǵan 3 adam 670 myń teńgeden astam syıaqy aldy, dep habarlaıdy QazAqparat tilshisi.

QR Sybaılas jemqorlyqqa qarsy is-qımyl agenttigi SQO boıynsha departamentiniń basshysy Sergeı Perovtyń aıtýynsha, sybaılas jemqorlyqpen kúrestiń bir joly – qylmys faktisi týraly habarlaǵandardy kótermeleý. Bul óz nátıjesin berip jatyr. Máselen bıylǵy alty aıda 3 adam jemqorlyq deregi týraly habarlap, sol úshin syıaqy alǵan.

«Azamattardy kótermeleýdiń saralanǵan júıesine sáıkes sybaılas jemqorlyq týraly habarlaǵan adamǵa para nemese keltirilgen zalalǵa qaraı aıyptaý úkimi shyǵarylǵannan keıin para somasynyń 10% beriledi. Alaıda eń joǵary syıaqy 4 myń AEK, ıaǵnı 13,8 mln teńgeden aspaýy kerek.

Qylmys faktisin sybaılas jemqorlyqqa qarsy qyzmettiń koll-ortalyǵynyń 1424 nómirine habarlap aıtýǵa bolady. Qońyraý shalý tegin», - deıdi Sergeı Perov.

Sergeı perovtyń aıtýynsha, jaqynda respýblıka boıynsha sybaılas jemqorlyqqa qarsy volonterler qabyldaý jobasy qolǵa alyndy.

Maqsat – volonterlerdiń kómegimen qoǵamnyń qylmystyń bul túrine tózbeýshiligin qalyptastyrý, sybaılas jemqorlyqqa ákeletin jaǵdaılar men sebepterdi anyqtaý.

Jobaǵa qoǵamnyń belsendi ókilderi, stýdentter, qoǵamdyq uıymdar, zańgerler, sarapshylar, memlekettik organdar jáne taǵy basqalary qatysa alady.