SQO-da suıytylǵan gazdyń lıtri 70 teńgeden saýdalanady

PETROPAVL. QazAqparat - Soltústik Qazaqstan oblysynda suıytylǵan gazdyń 1 lıtriniń bólshek saýdadaǵy shekti baǵasy - 70 teńge. Bul jaıynda SQO turǵyndarymen kezdesýde Energetıka mınıstri Bolat Aqsholaqov aıtty, dep habarlaıdy QazAqparat.

«Soltústik Qazaqstan oblysynda 18-ge jýyq gaz jelisi uıymy men avtomobılge gaz quıatyn 108 stansa bar», - dedi Bolat Aqsholaqov oblys halqymen kezdesýde sóılegen sózinde.

Onyń aıtýynsha, qańtarda Memleket basshysynyń tapsyrmasyna sáıkes Básekelestikti qorǵaý jáne damytý agenttigi suıytylǵan gazdyń shekti bólshek saýda baǵasyn memlekettik retteýdi belgilep, bekitken.

Soǵan sáıkes Soltústik Qazaqstan oblysynda suıytylǵan munaı gazynyń shekti bólshek saýda baǵasy - 1 lıtrge 70 teńge.

Oblysta suıytylǵan munaı gazyn tutyný 2021 jyly 57,6 myń tonnany qurady.

Bıylǵy qańtar-naýryz aılarynda turǵyndar shamamen 17,7 myń tonna tutynǵan.

«Energetıka mınıstrligi uzaqmerzimdi baǵa turaqtylyǵyn qamtamasyz ete otyryp, onyń ósýine jol bermes úshin suıytylǵan munaı gaz naryǵyn reformalaý sharalaryn qabyldap jatyr»,-dep atap ótti mınıstr.

Sharalardyń biri retinde óndirýshiler belgilegen bólshek saýda baǵasyn negizge ala otyryp, suıytylǵan munaı gazynyń shekti kóterme baǵasyn aıqyndaý ádistemesi ázirlenedi.

Bul túsimdi zaýyttar men satýshylar arasynda ádil bólýge múmkindik beredi.