SQO-da sútti mal sharýashylyǵynyń halyqaralyq forýmy men kórmesi ótip jatyr
Búgin Petropavlda sútti mal sharýashylyǵynyń «QazaqSut» birinshi halyqaralyq kórmesi ashylyp, «Pro Moloko.Trendy ‘23» halyqaralyq ekinshi forýmy ótip jatyr. Jalpy sútti mal sharýashylyǵyn damytýdy maqsat etken halyqaralyq is-shara eki kúnge shaqtalǵan. Oǵan qatysýǵa jergilikti aýyl sharýashylyǵy taýaryn óndirýshilermen qatar sheteldik – Anglııa, AQSh, Italııa, Germanııa jáne basqa elderden kelgen sarapshylar qatysyp jatyr.
«SQO – agrarlyq-ındýstrııalyq óńir. Biz aýylsharýashylyq salasyn, onyń ishinde mal sharýashylyǵyn damytýǵa erekshe kóńil bólip kelemiz. Búginde sharýa qojalyqtary nátıjeli ónim alý úshin birqatar jumys atqaryp jatyr. Birqatar jańa tehnologııalardy meńgerip jatyr. Bizdiń óńir, ásirese sút sharýashylyǵynda tájirıbemen bólisýge ázir. Ózderińizge belgili, SQO-da sút fermalaryn salý boıynsha aýqymdy pılottyq joba júzege asyrylyp keledi. Tek bıyldyń ózinde 17 zamanaýı sút kesheni salynyp jatyr. Bul sátti joba qazir respýblıka kóleminde júzege asa bastady. Sol sebepti sút fermalaryn salý jáne ónimdilikti arttyrý boıynsha jaqsy pikir almasý bolady degen senimdemin», - dedi kórmeni ashqan SQO ákimi Aıdarbek Saparov.
Óńir basshysynyń aıtýynsha, oblys agroónerkásip salasyndaǵy ınvest jobalardy «Soltústik» áleýmettik-kásipkerlik korporatsııasy arqyly qarjylandyrý boıynsha pılottyq jobany iske qosty. Nátıjesinde, 30 jańa sút fermasy ashyldy. Jergilikti agrarııler qajetti tájirıbe jınady. Sondyqtan bul forým mamandarǵa ózara bilim men tájirıbe almasýǵa sep bolmaq.
«Halyqaralyq sarapshylar men otandyq mal ósirýshiler qatysqan bul jıyn salany damytýǵa jaqsy serpin beredi dep oılaımyn. Forýmdy ótkizý úshin SQO-nyń tańdap alynýy beker emes. Bul óńir elimizde sút baǵyttaǵy mal sharýashylyǵyn damytýda kósh bastap keledi. Sútti mal sharýashylyǵyn damytýǵa bıyl respýblıkalyq bıýdjetten 100 mlrd teńge bólindi. Bul 11 oblysqa zamanaýı sút fermalaryn salýǵa jumsalady. Sonyń 17 mlrd teńgesi SQO-ǵa berilip otyr», - dedi Aýyl sharýashylyǵy vıtse-mınıstri Rústem Qurmanov.
Іs-shara aıasynda mal, aýyl sharýashylyǵy tehnıkasy men tehnologııalardyń, qyzmetter men qondyrǵylardyń kórmesi ótedi. Forým barysynda sút-taýarly fermalaryn salyp, iske qosýǵa qatysty, asyltuqymdy sıyrdy azyqtandyryp, ónimdiligin arttyrý boıynsha paneldik sessııalar ótedi. Kelgen qonaqtar oblystaǵy zamanaýı sút keshenderiniń jumysyn kórýge múmkindik almaq.