SQO-da sút zaýytyna 4,8 mlrd teńge ınvestıtsııa tartylyp, jańadan 85 jumys orny ashyldy

PETROPAVL. QazAqparat – Soltústik Qazaqstan oblysynda sút zaýyty jańǵyrtylyp, nátıjesinde jańadan jumys oryndary ashyldy, dep habarlaıdy QazAqparat tilshisi.

SQO ákimi baspasóz qyzmetiniń málimetinshe, «Maslodel» brendiniń kásipornyn jańǵyrtýǵa 4,8 mlrd teńge ınvestıtsııalyq qarjy tartyldy. Nátıjesinde sút zaýytynda 2 lıtrlik ydystarǵa quıylǵan sút jáne qaımaq pen aıran shyǵaratyn jańa jeli iske qosyldy. Osylaısha jańǵyrtýdan keıin kásiporynnyń qýaty jylyna 87 myńnan 119 myń tonnaǵa deıin ósip otyr. Qosymsha 85 jańa jumys orny ashyldy.

«Biz óndirgen barlyq ónimdi óńdeýge umtylýymyz kerek, bul óz naryǵymyzdy qamtamasyz etýge jáne eksportty ulǵaıtýǵa múmkindik beredi. Byltyr sút óndirý kólemi 597 myń tonnaǵa deıin ósti. 2016 jyly óńdeýge barlyq shıkizattyń 34,2 %-y nemese 180 myń tonna ǵana jiberildi. Al byltyr ol 319 myń tonnaǵa deıin ulǵaıdy, óndiriletin súttiń 53,5 %-y óńdeldi. ıAǵnı, 5 jyl ishinde sútti óńdeý úlesi 20% ósti», - deıdi kásiporyndy aralaǵan SQO ákimi Qumar Aqsaqalov.

Bul salada 5 jylda 400-den astam jumys orny ashyldy. Jyl saıyn bıýdjetke 500 mıllıon teńgeden astam salyq túsedi.

«Sút ónimderin óndirý mal sharýashylyǵyn belsendi damytýǵa kómektespek. Oblysta jalpy óndiris qýaty 57 myń tonna bolatyn 16 sút kesheni salynyp jatyr. Jyl sońyna deıin olar iske qosylady. Jalpy, 2026 jylǵa deıin 52 sút-taýar fermasy salynady, onda jylyna 160 myń tonna sút óndiriledi», - dedi Qumar Aqsaqalov.