SQO-da sýyq tıip aýyrǵandar sany kúrt ósti

<p>Soltústik Qazaqstan oblysynda dene qyzýynyń kóterilýine, qatty jótelge shaǵymdanyp, dárigerge qaralǵandar sany kúrt artty. Ótken bir apta ishinde 4 myńǵa jýyq adamǵa jiti respıratorlyq vırýstyq ınfektsııa dıagnozy qoıyldy, dep habarlaıdy <a href="https://kaz.inform.kz/" target="_blank" rel="noopener">Kazinform.&nbsp;</a></p>

SQO sanıtarııalyq-epıdemıologııalyq baqylaý departamenti baspasóz qyzmetiniń málimetinshe, qazan-qarasha aıynda óńirde JRVI-di juqtyrý boıynsha 26 841 jaǵdaı tirkelgen. Tek sońǵy aptada 3926 adam aýyrǵan. Bul onyń aldyndaǵy aptamen salystyrǵanda 42%-ǵa artyq. Naýqastardyń 2912-si nemese 74%-y – 14 jasqa deıingi bala.

«SQO-da H3N2 tıpti A tumaýyn juqtyrýdyń bir jaǵdaıy tirkeldi. Qaýipti ınfektsııanyń ári qaraı taralmaýy úshin vaktsınatsııa belsendi júrgizildi. Qazirgi ýaqytta oblys halqynyń 11% vaktsınatsııalandy, DDSU usynysy boıynsha keminde 10% ekpe alýy tıis. Óńirge reseılik «Grıppol plıýs» vaktsınasynyń 60 000 dozasy satyp alynǵan bolatyn. Vaktsınatsııa jospary 100% oryndaldy. Nátıjesinde 9 myńǵa jýyq medıtsına qyzmetkeri, 4,5 oqýshy, 555 júkti áıel, 23 myńnan astam sozylmaly aýrýy bar adam, 600-den astam jabyq úlgidegi mekemelerdiń turǵyny, myńnan astam qart pen múgedek jáne 21 myńnan astam adam epıdemıologııalyq kórsetkishter boıynsha ekpe aldy», - deıdi SQO sanıtarııalyq-epıdemıologııalyq baqylaý departamenti basshysynyń orynbasary Arman Kúshbasov.