SQO-da sý basqan aýyldardy qutqarý boıynsha respýblıkalyq oqý-jattyǵý bastaldy
«Kóktem – 2022» respýblıkalyq komandalyq-shtabtyq oqý-jattyǵýlarynyń birinshi kúni Qyzyljar aýdanynda ótti. Bul aýdan kóktemgi tasqyn sý zardabyn tartýy múmkin qaýipti aımaqtarǵa jatady. Máselen, 2017 jyly mundaǵy 11 aýylda 156 turǵyn úı sý astynda qaldy. Eń kóbi – 76 úı Teplıchnoe eldi mekeninde sýǵa ketti.
SQO Tótenshe jaǵdaılar departamenti baspasóz qyzmetiniń málimetinshe, is-sharaǵa oblys ákiminiń orynbasary Sátjan Ablalıev jáne oqý-jattyǵý shtabynyń bastyǵy – SQO TJD bastyǵy Ramıl Kamalov qatysty.
Tańerteń Teplıchnoe aýylynyń mańaıy eldi mekendi Esil ózeniniń tasqyn sýynan qorǵaý úshin ınertti materıaldarmen kóterildi. QR Ulttyq ulan 6637 áskerı bóliminiń jeke quramy shartty túrde jeke aýlalardyń sý basqan aýmaqtarynan sý soryp, ınjenerlik tehnıkamen jumys istedi. Bólimshe sarbazdary qaptar daıyndap, tasqyn sýdyń jolyn bógedi.
Al Prıbrejnoe aýylynda sý tasqyny saldarynan zaqymdalǵan baılanys jáne elektr jelilerinde avarııalyq-qalpyna keltirý jumystary júrgizildi, tok soqqan adamǵa alǵashqy medıtsınalyq kómek kórsetilip, ony emdeý mekemesine jedel jetkizý tásilderi pysyqtaldy.
Oqý-jattyǵý barysynda qarttardy, áıelder men balalardy, turaqty medıtsınalyq kómekke muqtaj azamattardy orta mektep bazasynda ashylǵan evakýatsııalyq pýnktke kóshirý atqaryldy.
Sonymen qatar, eldi mekenderde qardy tıeý jáne shyǵarý, egistikterdi qaraıtý, ınjenerlik tehnıkany paıdalana otyryp, sý ótkizý qubyrlary men kanaldardy tazalaý boıynsha jumystar júrgizildi.
«Sý tasqyny bolǵan jaǵdaıda jedel áreket etý úshin oblysta quramynda 134 tehnıka jáne TJD, polıtsııa jáne Ulttyq ulan sarbazdary - 475 adam bar jedel top qurylǵan. Búgingi oqý-jattyǵýǵa barlyǵy jeke quramnan 200-den astam adam jáne 40 tehnıka jumyldyryldy», - dedi SQO TJ departamentiniń bastyǵy Ramıl Kamalov.