SQO-da stýdentter arasynda jappaı tóbeles boldy

PETROPAVL. QazAqparat – Petropavlda M.Qozybaev atyndaǵy Soltústik Qazaqstan memlekettik ýnıversıtetiniń 2-3 kýrs stýdentteri tóbeles shyǵaryp, oqý ornynyń 46 stýdentin polıtsııa ustady. Іstiń mán-jaıy anyqtalyp jatyr, dep habarlaıdy QazAqparat tilshisi.

SQO Polıtsııa departamenti baspasóz qyzmetiniń málimetinshe, 20 qazan kúni Esil ózeniniń jaǵasyndaǵy «Vostochnyı bereg» dámhanasynyń janyna biraz jastar jınalǵany týraly polıtsııaǵa telefon habarlamasy túsken. Jedel basqarý ortalyǵynyń qyzmetkerleri oqıǵa ornyna shuǵyl túrde jaqyn mańdaǵy polıtsııanyń keshendi kúshiniń jaıaý baǵytyn jáne Petropavl qalalyq PB patrýl polıtsııa batalonynyń 11 avtopatrýlin jiberdi.

«Avtopatrýlder men oblystyq jáne qalalyq polıtsııa basshylyǵy oqıǵa ornyna kelip jetisimen jastar jan-jaqqa bytyrap, qasha jóneldi. Aýdandy tekserý barysynda M.Qozybaev atyndaǵy SQMÝ-diń 46 stýdenti ustalyp, Podgornyı ýchaskelik polıtsııa pýnktine jáne Petropavl qalalyq polıtsııa bólimine jetkizildi», - deıdi baspasóz qyzmetiniń mamandary.

Jappaı tóbeleske SQO-ǵa «Serpin» baǵdarlamasymen ońtústik oblystardan oqýǵa kelgen 2-3 kýrs stýdentteri qatysqan. Jastardyń aıtýynsha, joǵary kýrstyń jigitteri álimjettik kórsetip, olardan aı saıyn belgili bir somada aqsha berip turýdy talap etken. Janjaldyń sońy tóbeleske ulasqan.

Ýnıversıtettiń áleýmettik máseleler jáne tárbıe isi jónindegi prorektory Nurlan Baımbetov «tóbeleske qatysqan barlyq stýdentke qatań jaza qoldanamyz» dep otyr.

«Biz mundaı jaǵdaı bolyp jatqanyn bilgen joqpyz. Aıtýlarynsha, 3-kýrstyń 7 stýdenti kezdesetin oryn belgilep, 2 kýrstyń 3-4 sýdentin shaqyrǵan. Alaıda kezdesýge eki jaqtan 50 shaqty adam barǵan. Kúshiniń basymdyǵyn paıdalanyp tómen kýrstyń balalary olardy qýǵan, bireýin ustap alyp, urǵan. Jaraqat alǵan stýdentke alǵashqy medıtsınalyq járdem kórsetildi. Tóbeles uıymdastyrǵandar oqýdan, qalǵandary jataqhanadan shyǵarylady», - deıdi Nurlan Baımbetov.

Keshe 21 qazan kúni ýnıversıtet rektory Serik Ómirbaev áleýmettik jelidegi jeke paraqshasynda qyzmetinen ketkenin jazdy. Alaıda, joǵary oqý ornynyń baspasóz qyzmeti rektordyń jumystan ketýiniń bolǵan oqıǵaǵa esh qatysy joq ekenin aıtady.

Atalǵan fakti QR QK 293-baby «buzaqylyq» boıynsha tirkeldi. Qazirgi ýaqytta bolǵan oqıǵanyń mán-jaıyn tolyq anyqtaý maqsatynda jedel tergeý is-sharalary júrgizilýde.

Tergeý barysy polıtsııa departamenti, qalalyq jáne oblystyq prokýratýra basshylyǵynyń baqylaýynda bolmaq.