SQO-da sportty damytýǵa bıyl 11 mlrd teńgege jýyq bólindi

PETROPAVL. QazAqparat – Soltústik Qazaqstan oblysynda sport salasyna bıyl 11 mlrd jýyq teńge bólingen. Osylaısha sońǵy 5 jylda qarjylandyrý shamamen eki ese artty, dep habarlaıdy QazAqparat tilshisi.

SQO Dene shynyqtyrý jáne sport basqarmasynyń málimetinshe, óńirde sportpen júıeli túrde turǵyndardyń 40,2% nemese 215 myń aınalysady. Buqaralyq sport qoljetimdi bolýy úshin oblysta sport nysandarynyń sany jyldan-jylǵa kóbeıip keledi. Máselen bıyl aýdandarda 36 shaǵyn fýtbol jáne sport alańdaryn salý josparlansa, sonyń 20-sy qoldanysqa berildi.

Budan basqa Aıyrtaý, Esil, Jambyl jáne Ǵabıt Músirepov atyndaǵy aýdandarda 4 dene shynyqtyrý-saýyqtyrý keshenderiniń qurylysy júrip jatyr.

Bıyl sport nysandarynyń materıaldyq-tehnıkalyq bazasyn nyǵaıtýǵa 761,7 mln teńge bólingen. Bul qarajatqa sport quraldaryn satyp alý jáne aǵymdaǵy, kúrdeli jóndeý josparlanǵan.

«Aýyl – el besigi» baǵdarlamasy aıasynda Tımırıazev aýdanynyń ortalyǵynda stadıon kúrdeli jóndelip jatyr.

«Balalar men jasóspirimder sport mektepterinde aǵymdaǵy jáne kúrdeli jóndeý júrgizilýde.

Jalpy oblysta 2 951 sport nysany bar, onyń 27-si balalar men jasóspirimder sport mektebi, 25 aýla klýby, 9 sport klýby, 11 balalar men jasósipirder dene shynyqtyrý klýby jumys isteıdi.

5 - 17 jas aralyǵyndaǵy 99 myń balanyń óńirde 46,4% tegin sport sektsııalarymen qamtylǵan. Bıyl memlekettik tapsyrys boıynsha sporttyń 15 túrimen 2,5 myńnan astam bala tegin aınalysyp jatyr. Bul maqsatqa jergilikti bıýdjetten 423,4 mln teńge bólindi», - deıdi basqarma basshysy Sergeı Melehov.