SQO-da sottalǵan adamdy qutqaryp qalǵan probatsııa qyzmetkeri nagradtaldy
SQO qylmystyq-atqarý júıesi departamenti baspasóz qyzmetiniń málimetinshe, QR Prezıdentiniń Jarlyǵymen Maǵjan Jumabaev aýdanynyń probatsııa qyzmeti bóliminiń ınspektory ádilet aǵa leıtenanty Ǵalymjan Baıbýsın sottalǵannyń ómirin saqtap qalǵany úshin «Erligi úshin» medalimen marapattaldy.
Esterińizge sala ketsek, probatsııa qyzmeti bóliminiń ınspektory Ǵalymjan Baıbýsın kúndelikti profılaktıkalyq áńgime júrgizý úshin sottalǵandardyń birine habarlasqan. Alaıda er adam telefonǵa jaýap bermegen. Sottalǵannyń júrgen jerin bilip otyrý úshin taǵylǵan elektrondy qural da qýatynyń bitýine baılanysty kórsetpegen. Biraq sońǵy málimetter boıynsha, sottalǵan turǵylyqty jerinen ketpegen.
Ádilet aǵa leıtenanty ýchaskelik polıtsııa ınspektorymen birge mán-jaıdy anyqtaý úshin sottalǵan adamnyń úıine barǵan, alaıda esigi ishinen qulyptaýly bolǵan.
«Úıden ótkir ıis shyǵyp, tútin terezeden kórindi. Órt shyqqanyn túsinip, birden áınekti syndyryp, úıge kirdik. Úı ıesi – sottalǵandy tósekte es-tússiz jatqan kúıinde taptyq. Jedel járdem shaqyryp, oǵan dereý alǵashqy medıtsınalyq kómek kórsettik. Keıin Býlaev qalasyndaǵy ortalyq aýdandyq aýrýhanaǵa jetkizildi. Kásibı dárigerlik kómek kórsetilgennen keıin ol esin jınady», - deıdi Ǵalymjan Baıbýsın.
Keıin belgili bolǵandaı, uıyqtar aldynda er adam temeki tuqylyn peshke tastaı salǵan. Onyń otyn men qaǵazǵa tolyp turǵanyn umytyp ketken. Durys sónbegen tuqyldan aǵash tutanyp, ýly gaz ishke taraǵan. Oǵan qosa pesh qasynda turǵan plastık legen de qyzýdan balqyp, ótkir ıis shyǵarǵan.
Ádilet aǵa leıtenanty Ǵalymjan Baıbýsınniń qyraǵylyǵynyń jáne ýaqtyly kórsetilgen alǵashqy medıtsınalyq kómektiń arqasynda sottalǵan tiri qaldy.