SQO-da sońǵy úsh jylda polıtsııanyń jeti qyzmetkeri «Erligi úshin» medalimen marapattaldy
SQO Polıtsııa departamenti baspasóz qyzmetiniń málimetinshe, saltanatty shara memlekettik qyzmetshilerdiń ant qabyldaý rásiminen bastaldy.
«Memleketimiz beıbit ómir men azamattardyń tynyshtyǵyn, qaýipsizdigin jáne olardyń konstıtýtsııalyq quqyqtarynyń saqtalýyn qamtamasyz etip otyr. Sondaı-aq, basty mindetterdiń biri halyq pen quqyqtyq tártipti saqtaıtyn organdardyń arasynda sapaly qarym-qatynasty qalyptastyrý. Azamattardyń seniminsiz básekege qabiletti memleket qurý múmkin emes. Sizder qyzmetke qabyldanǵan sátten bastap, ómirińiz ben densaýlyǵyńyzdy báıgege tige otyryp, Táýelsizdigimizdi nyǵaıtýǵa qomaqty úles qosyp kelesizder. Tek óz eliniń patrıoty ǵana ózge jandardyń múddelerin qorǵaýǵa daıyn. Bizdiń oblystyń polıtsııa qyzmetkerleri boıynda osy qasıetterdiń baryna senimdimin. Batyldyq pen erlik memleket basshylyǵymen joǵary baǵalanady jáne azamattardyń tarapynan qurmetke laıyq. Bul jas qyzmetkerler úshin borysh pen antqa adal bolýdyń jarqyn úlgisi. Qazaqstan polıtsııasy qyzmetkerleriniń tárbıelep ósirgen ardagerlerge, olardyń adal eńbegine erekshe alǵys bildirgim keledi», - deıdi merekelik is-sharaǵa qatysqan oblys ákiminiń orynbasary Rýslan Álishev.
Ol quqyqtyq tártipti saqtaýda erekshelengen qyzmetkerlerge oblys ákimi Qumar Aqsaqalovtyń marapattaryn tabystady. Qurmet gramotasy Petropavl qalalyq Polıtsııa basqarmasynyń krımınaldyq polıtsııa bóliminiń bastyǵy Rýslan Syzdyqovqa tabys etildi. Ol qyzmet atqarǵan jyldary myńnan astam qylmysty ashyp, júzdegen adamǵa joǵaltqanyn qaıtaryp qana qoımaı, senim men ádildikti, zańnyń ústemdigin kórsete bildi.
Polıtsııa departamentiniń bastyǵy Marat Tólebaev memlekettik merekemen quttyqtaı otyra, soltústikqazaqstandyq polıtseıler aldaǵy ýaqytta da quqyqtyq tártipti saqtap, qoǵamdyq qaýipsizdikti qamtamasyz etýde ózderiniń qyzmettik mindetterin abyroımen atqarady dep senim bildirdi.
«Búgingi tańda qatarymyzda memlekettik nagradalarǵa laıyqty qyzmetkerler barshylyq. Sońǵy úsh jyldyń ishinde Qazaqstan Respýblıkasy Prezıdentiniń Jarlyǵymen bizdiń 7 qyzmetkerimiz «Erligi úshin» medalimen marapattaldy», - dep vedomstvo basshysy atap ótti.
Mýzykalyq súıemeldeýmen marapattaýǵa sahnaǵa 55 polıtseı jáne ardager kóterildi. Jeti ofıtser men serjant merziminen buryn jáne kezekti ataqtaryna ıe boldy. Merekelik buıryqpen barlyǵy 85 polıtseı marapattaldy. Saltanatty is-shara vedomstvonyń mádenı ortalyǵynyń kontserttik baǵdarlamasymen ulasty.