SQO-da sońǵy úsh jylda bıýdjetten mádenıet salasyna 25 mlrd teńge bólindi

PETROPAVL. QazAqparat – Soltústik Qazaqstan oblysynda mádenıet salasynda da maman jetispeıdi. Máseleni sheshý úshin óńirde birqatar shara qolǵa alyndy, dep habarlaıdy QazAqparat tilshisi.

SQO ákiminiń orynbasary Dáýren Jandarbek óńirlik kommýnıkatsııalar qyzmetinde baspasóz máslıhatyn ótkizip, mádenıet pen sport salasynda atqarylǵan jumystarǵa toqtaldy, josparlary týraly áńgimeledi.

Qazirgi ýaqytta oblysta 602 mádenıet nysany bar. Sońǵy úsh jylda salany damytýǵa 25 mlrd teńgeden astam qarjy jumsalǵan.

«Memleket basshysynyń tapsyrmasyna oraı mádenıet salasy qyzmetkerleriniń eńbekaqysy kezeń-kezeńmen ósirilip jatyr. 2025 jylǵa deıin eki ese artpaq. Budan basqa jergilikti bıýdjet esebinen ártisterge kásibı sheberlikterine qaraı eńbekaqysynyń 50% deıin ústemeaqy tólenedi», - deıdi oblys ákiminiń orynbasary.

Bul salada da kadr jetispeýshiligi bar. Osyǵan oraı qajettilikti jabý úshin oblys ákiminiń granty bólinetin boldy. Nátıjesinde 100 maman bıýdjet esebinen bilim alyp shyǵady.

«Mádenıet nysandarynyń halyq úshin qoljetimdi bolýy da mańyzdy. Sońǵy úsh jylda 8,6 mlrd teńgeniń 84 jobasy júzege asyryldy. Sonyń biri – Sábıt Muqanov atyndaǵy mýzykalyq-dramalyq teatrynyń jańa ǵımaraty. Táýelsizdik jyldary elimizde 8 jańa teatr paıdalanýǵa berilgen eken. Bizdiń óńirde ashylǵany – toǵyzynshysy», - deıdi Dáýren Jandarbek.

Petropavlda júzege asyp jatqan iri jobalardyń biri – Islam mádenıetiniń mýzeıi. Kırov atyndaǵy zaýyttyń aýmaǵyndaǵy kóne ǵımarat qazirgi ýaqytta jańartylyp jatyr. Ol – oblys ortalyǵynyń kórikti nysandarynyń birine aınalmaq.