SQO-da sońǵy 13 jyldaǵy eń mol egin jınaldy

<p>ASTANA. KAZINFORM &ndash; Soltústik Qazaqstan oblysynyń ekonomıkasyna sý tasqyny men onyń saldar áser etpeı qoıǵan joq. Degenmen negizgi salalar boıynsha oń ósim baıqaldy. Bul týraly óńir ákimi Ǵaýez Nurmuhambetov eseptik brıfıngte aıtyp berdi.</p>

– Bıylǵy 10 aıdyń qorytyndysy boıynsha aýyl sharýashylyǵy salasy 130,2%, ónerkásip – 100,1%, qurylys – 127,3%, paıdalanýǵa berilgen turǵyn úıler – 122,9%, ınvestıtsııalar – 109,4% ósim kórsetti. Agroónerkásiptik keshen óńir ekonomıkasynyń basty salasy bolyp qalady. Memleket basshysy aýyl sharýashylyǵy ónimin 2 esege ulǵaıtý mindetin qoıdy. Óńirdiń bul maqsatqa qol jetkizý áleýeti aıtarlyqtaı joǵary, - dedi Ǵaýez Nurmuhambetov Astanada Ortalyq kommýnıkatsııalar qyzmetinde.

Ákimniń aıtýynsha, bıylǵy egin jınaý jumystary sońǵy 13 jyldaǵy eń tabysty naýqannyń biri boldy.

– Agrarshylar 6,2 mln tonnadan astam astyq jınady, ónimdiligi 18,6 ts/ga. Respýblıka boıynsha dándi daqyldar ósiretin óńirler arasynda ekinshi orynda turmyz. 55 myń tonna jeńildetilgen dızel otyny bólindi. Oǵan qosa, astyqty keptirý úshin qosymsha 20 myń tonna otyn baǵyttaldy, - dedi spıker.

Onyń aıtýynsha, bıyl qoldanylatyn mıneraldy tyńaıtqyshtardyń kólemi edáýir ulǵaıdy, ótken jyly 190 myń tonna qoldanylsa, bıyl – 256,6 myń tonna sebildi.

– Jyl basynan beri agrarshylar 58 mlrd teńgege 2 myńnan astam tehnıka men jabdyq satyp aldy. Alǵash ret otandyq aýyl sharýashylyǵy tehnıkasynyń jeńildikti lızıngi baǵdarlamasy iske qosyldy, onyń sońǵy mólsherlemesi jyldyq 5% qurady, - dedi Ǵaýez Nurmuhambetov.

Buǵan deıin Soltústik Qazaqstan oblysynyń ákimi kóktemgi sý tasqyny saldary qalaı qalpyna keltirilgenin aıtyp bergen edi.