SQO-da sıntetıkalyq esirtki satqan adam 7 jylǵa qamaldy

PETROPAVL. QazAqparat – Soltústik Qazaqstan oblysynda «spaıs» atty sıntetıkalyq esirtkini qoldan jasap, satqan er adam 7 jylǵa bas bostandyǵynan aıyryldy, dep habarlaıdy QazAqparat tilshisi.

SQO Polıtsııa departamenti baspasóz qyzmetiniń málimetinshe, Petropavldyń 27 jastaǵy turǵyny sıntetıkalyq esirtki satýy múmkin degen kúdikpen kóktemde polıtsııanyń nazaryna ilikken. Ony tártip saqshylary muqııat baqylaýda ustaý nátıjesinde, shilde aıynda esirtki satýshy qylmys ústinde ustaldy. Tekserý kezinde er adamnan 3 gramm «spaıs» tabyldy. Úıine tintý júrgizý barysynda 4 gr astam esirtki ázirleýge qajet kontsentrat pen 78 gr asa daıyn esirtki alyndy. Budan bólek, gramdap ólsheıtin tarazy, zıplok - býyp-túıý materıaldary, 800 myń teńgeden asa aqsha jáne aqsha aýdarymdarynyń chekteri alyndy.

«Spaıs» sıntetıkalyq kannabınoıd, áseri kúshti esirtkiniń bir túri. Alynǵan kontsentrat 200-ge jýyq doza daıyndaýǵa jetkilikti. Qylmysker «Esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý» baby boıynsha sottaldy», - deıdi Petropavl qalalyq polıtsııa basqarmasy esirtki qylmysyna qarsy is-qımyl bóliminiń bastyǵy Rahat Nurahmetov.

Polıtseılerdiń aıtýynsha, ustalǵan 16 jasynan bastap esirtki qoldana bastaǵan.

SQO qylmystyq ister boıynsha mamandandyrylǵan aýdanaralyq soty «spaıs» degen atpen belgili sıntetıkalyq esirtkini daıyndap, ótkizýmen aınalysqan 27 jastaǵy Petropavl turǵynyn 7 jylǵa bas bostandyǵynan aıyrýǵa úkim shyǵardy.