SQO-da sıntetıkalyq esirtki satatyn 60-tan astam saıt jabyldy

PETROPAVL. QazAqparat - Soltústik Qazaqstan oblysynda narkologııa ortalyǵynda 800 nashaqor esepte tur, dep habarlaıdy QazAqparat tilshisi.

Polıtsııa departamenti baspasóz qyzmetiniń aqparaty boıynsha, sıntetıkalyq esirtkini shamadan tys paıdalanýǵa qatysty 50 fakti anyqtalǵan.

«Biz sıntetıkalyq esirtki satatyn 60 elektrondyq resýrsty anyqtadyq. Olardyń barlyǵy buǵattaldy, biraq bul olardyń jańa ınternet paraqshalardy ashýǵa kedergi bolmaı tur», - dep atap ótti Esirtki bıznesine qarsy kúres basqarmasy bastyǵynyń mindetin atqarýshy Ivan Terzıdı.

Bul resýrstardyń siltemesin Petropavl ǵımarattarynyń qabyrǵalaryna jıi jazyp ketedi. Mundaı jazbalardy turǵyn úılerden, aıaldamalardan, garajdardan baıqaýǵa bolady. Kóptegen azamattar bul graffıtılerdiń neni bildiretinderi bilmeıdi. Al, jastar áýesqoılyqpen siltemege kirip, esirtki taratatyndardyń jelisine tap bolýy múmkin.

Esirtki bıznesine qarsy kúres basqarmasynyń qyzmetkerleri «Biz esirtkige qarsymyz» aktsııasyn uıymdastyrdy. Oǵan polıtseıler, kolledj, ýnıversıtet stýdentteri, eriktiler qatysty. Stýdentter bir kúnniń ishinde 100 siltemeni óshirip shyqty.
 

«Mundaı aktsııalarmen halyqtyń nazaryn osy máselege aýdarmaqshymyz. Ázirge biz tek graffıtılerdi boıaý arqyly ǵana kúrese alamyz. Qazir sıntetıkalyq esirkilerge qarsy kúres máselesi zańnamalyq deńgeıde qarastyrylyp jatyr», - dep atap ótti Ivan Terzıdı.

Jyl basynan beri soltústikqazaqstandyq polıtseıler 1,5 keli sıntetıkalyq esirtki tárkilegen.