SQO-da shyrshany brakonerlerden qorǵaý úshin 95 mobıldi top quryldy

PETROPAVL. QazAqparat – Soltústik Qazaqstan oblysynda qylqan japyraqty aǵashtardy zańsyz kesýden qorǵaý maqsatynda ormanshylar kúsheıtilgen jumys rejımine kóshti. Brakonerlermen kúreske 95 mobıldi top quryldy, dep habarlaıdy QazAqparat tilshisi.

Jańa jyl meıramynyń sáni - shyrshaǵa mereke jaqyndaǵan saıyn suranys artady.

Búginde qylqan japyraqty aǵashtardy saýdaǵa shyǵaryp, satyp jatqandar da bar.

Alaıda elimizde bul jasyl jelekti kesýge moratorıı jarııalanǵan. Sondyqtan osy ýaqytta ormanshylardyń jumysy qyza túsedi.

«1 jeltoqsannan 31 jeltoqsanǵa deıin jańa jyl meıramyna oraı qylqan japyraqty aǵashtardy qorǵaýǵa aldyq. Bul jumysqa 50 adam tartylǵan, olar polıtseılermen birge reıdterge shyǵady. Orman sharýashylyǵynda 13 mobıldi top qurylǵan. Sondaı-aq taǵy eki jerde Krasnoıar jáne Vınogradov ormanshylyǵynda statsıonarlyq beket jumys istep jatyr», - deıdi Sokolovskoe orman sharýashylyǵynyń aǵashtardy qorǵaý jáne kúzetý ınjeneri Alekseı Kýcherıavenko.

Sokolovskoe ormanshylyǵynda qylqan japyraqty aǵashtar 1300 gektar jerdi alyp jatyr. Bul, mamandardyń aıtýynsha, úlken aýmaq.

Jasyl jelekti brakonerlerden qorǵaý úshin ormashylar táýlik boıy kezekshilik etedi.

Budan basqa turǵyndarmen aldyn alý, túsindirý jumystary júrgiziledi eken.

«Qylqan japyraqty aǵashty zańsyz keskenderge kelgen shyǵynǵa qaraı ákimshilik jáne qylmystyq jaza qarastyrylǵan. Eger 100 AEK mólsherinen az shyǵyn keltirilse, bul 364 myń teńge shamasynda, onda kináli adam ákimshilik jaýapkershilikke tartylyp, 100 AEK mólsherinde aıyppul tóleıdi. Al odan kóp mólsherde shyǵyn keltirse, onda qylmystyq jaýapkershilik bar. Bul 180 AEK mólsherinde aıyppul nemese soǵan saı keletin túzetý jumystary. Sondaı-aq 45 táýlikke deıin qamalýy múmkin. Eki jaǵdaıda da brakonerlik quraldary: kólik, ara, t.b. jáne kesilgen aǵash tárkilenedi», - deıdi Alekseı Kýcherıavenko.

Mamannyń aıtýynsha, Jańa jyl meıramy qarsańynda bir qylqan japyraqty aǵashtyń quny 15 AEK-ke baǵalanǵan, ıaǵnı bir shyrshany kesse 45 myń teńgeden asa shyǵyn keltirgen bolyp esepteledi. Zańnyń qatańdatylýynan bolar sońǵy jyldary óńirde qylqan japyraqty aǵashty ruqsatsyz kesý faktileri tirkelmegen.

Desek te, SQO ormanshylary jylda osy ýaqytta jumysty kúsheıtedi.

«Oblys boıynsha 17 statsıonarlyq beket bar, 95 mobıldi top qurylǵan. Olar ormandarda ǵana kezekshilik etpeı, eldi mekenderge kirip, qylqan japyraqty aǵashty satyp jatqandardyń qujattaryn tekseredi. 795 danaǵa komıtetke tapsyrys berdik. Onyń 500 danasyn Kondratov orman pıtomnıgi bóledi. Qylqan japyraqty aǵashtar tek mekemelerge – mektepterge, bala baqshalarǵa buqaralyq is-sharalardy ótkizý úshin ǵana beriledi», - deıdi SQO tabıǵı resýrstar jáne tabıǵatty paıdalanýdy retteý basqarmasynyń mamany Qaırolla Baıteńizov.