SQO-da shetel azamaty shekarany zańsyz jaıaý kesip ótken

PETROPAVL. QazAqparat – Soltústik Qazaqstan oblysynda elge zańsyz kirgen sheteldik azamat qylmystyq jaýapkershilikke tartylady, dep habarlaıdy «QazAqparat» HAA tilshisi.

Polıtsııa departamenti baspasóz qyzmetiniń málimetinshe, 33 jastaǵy Tájikstan azamaty sottyń sheshimimen zańnama tártibin birneshe márte buzǵany úshin Qazaqstannan shyǵarylǵan.

Alaıda biraz ýaqyttan keıin sheteldik shekarany jaıaý kesip ótip, Qazaqstanǵa qaıtyp kelgen. Endi ol memlekettik shekarany zańsyz ótkeni úshin qylmystyq jaýapkershilikke tartylýy múmkin.

Mıgratsııalyq zańnama tártipteriniń buzylǵany úshin óńir turǵyndary da jaýapty. Zańbuzýshylyqtardyń basym kópshiligi sheteldik qonaqtardyń ýaqytynda tirkelmeýimen baılanysty. Sheteldik jumys kúshin zańsyz paıdalaný derekteri de kezdesedi.

«Tájikstan Respýblıkasynyń tórt azamatyn zańsyz túrde jumysqa tartqany úshin Shal aqyn aýdanynyń 31 jastaǵy azamaty ákimshilik jaýapkershilikke tartyldy. Sheteldikter jumysqa ornalasý ruqsatynsyz eńbek etip, óńirde tirkeýsiz turyp jatqan. Zańsyz júrgender de, olardyń jumys berýshileri de jazalandy», - dedi baspasóz qyzmetinde.

Jyl basynan beri oblysta QR aýmaǵyna kirý tártibin buzǵan 1863 adam ákimshilik jaýapkershilikke tartyldy. Sheteldik jumys kúshin zańsyz eńbekke aralastyrǵany úshin 78 jumys berýshi jaýap berdi.