SQO-da «Serpinmen» bilim alǵan jastardyń jartysyna jýyǵy keri qaıtqan
Petropavlda «Ádildik jáne órkendeý» qoǵamdyq qory fılıalynyń uıymdastyrýymen «Máńgilik el jastary - ındýstrııaǵa» - «Serpin - 2050» memlekettik baǵdarlamasymen bilim alǵandardy jumysqa ornalastyrý máselesine qatysty jıyn ótti. Túlekterdiń turaqtamaı ketýiniń obektıvti sebepteri jáne osy protsesti sheshý joldary aıtyldy.
Bıyl bul baǵdarlamanyń iske qosylǵanyna 10 jyl tolyp otyr. Suranysqa ıe pedagogıkalyq, tehnıkalyq, aýyl sharýashylyǵy mamandyqtaryn meńgertý úshin Almaty, Jambyl, Qyzylorda, Ońtústik Qazaqstan, Mańǵystaý oblystarynyń jastaryna memlekettik bilim berý granttary berildi.
Joba elimizdiń eńbek tapshylyǵy bar óńirlerindegi kadrlyq áleýetti tolyqtyrýǵa, túlekterdi Soltústik Qazaqstan oblysynda jumysqa tartyp, osy jaqta qaldyrýǵa negizdelgen.
2014 jyldan 2024 jylǵa deıingi aralyqta M.Qozybaev atyndaǵy Soltústik Qazaqstan ýnıversıtetin 1373 jas maman bitirdi. Alaıda, solardyń tek 48% ǵana qalyp, jumysqa ornalasqan.
«Sýbsıdııa bólinip jatyr, biraq ol adamnyń turý jaǵdaıyna beriledi. Bizde odan da basqa másele bar. Biz oqý bitirgesin jumysqa ornalasa alamyz ba? Biz bul jerde jumys tappasaq, baspananyń ne qajeti bar? Jumys bolmasa basqa jaqqa ketemiz. Mine saǵan jumys, endi sen myna baspanada turasyń dese – munymen kelisemin.
Statıstıkaǵa qaraıtyn bolsaq, júz adamnyń tek jartysyna jýyǵy ǵana qalǵan. Demek bul baǵdarlamanyń qazir jalǵan júrip jatqandyǵynyń belgisi. Bizde óńirge kelýshilerdiń sany kóp bolǵanymen, qalýshylardyń sany shamaly. Qazirgi ýaqytta keltirý máselesine kóp nazar aýdaryp jatyr, al qaldyrý jaǵy aqsap tur. Bul jaqta jaǵdaı jasalsa, eshqandaı jarnamanyń qajeti bolmaıdy, halyq ózi keledi», - deıdi osy baǵdarlamamen bilim alyp jatqan stýdent Dıas Іzbasar.
Bıyl memlekettik baǵdarlamamen joǵary oqý ornyn 71 túlek aıaqtaǵan. Olardyń 33-ine bos jumys orny usynylsa, oqý bitirisimen tek 10-y ǵana ornalasqan. 36 túlek magıstratýraǵa túsýine jáne ekeýi dekrettik demalysqa baılanysty bosatylǵan.
M.Qozybaev atyndaǵy Soltústik Qazaqstan ýnıversıteti ókilderiniń aıtýynsha, túlekterdiń qaıtyp ketýiniń birneshe sebebi bar, olar: qoljetimdi baspananyń joqtyǵy, tómen eńbekaqy, jaqyn týystarynyń bolmaýy, qolaısyz aýa raıy jáne orys tilin jetik bilmeý.
2024-2025 oqý jylyna «Halyq tyǵyz qonystanǵan jáne batys óńirlerdegi jastarǵa arnalǵan granttar» kvotasy boıynsha 25 stýdent, «QR Úkimeti aıqyndaǵan óńirlerge qonys aýdaratyn aýyl jastary» kvotasy boıynsha 23 stýdent alynǵan.
Jalpy qazir «Serpin» baǵdarlamasy boıynsha jergilikti joǵary oqý ornynda 204 stýdent bilim alyp jatyr, olardyń 68-i 4 kýrsta oqıdy.
Buǵan deıin SQO-da 45 aýyl jabylatyndyǵyn jazǵan edik.