SQO-da senbilik jasaǵandar eki turǵyn úı men qorany órtep aldy
SQO Tótenshe jaǵdaılar departamenti baspasóz qyzmetiniń málimetinshe, órtke qaýipti kezeńi bastalǵaly 101 qyzmetine 18 ret shaqyrtý túsken. Saıajaı qaýymdastyqtarynda, ormandy-dalaly aýmaqtarda qurǵaq shóp janǵan.
«Mańaılaryn jınaǵan turǵyndar, keıin qoqysqa órt qoıady. Ol jelmen órship ketýi múmkin. Osyǵan baılanysty turǵyndardy qaýipsizdik sharalaryn ustanýǵa shaqyramyz. Osyndaı otty abaısyz qoldanýdyń saldarynan birer kún buryn úlken órt boldy. Taıynsha aýdany Letovochnoe eldi mekeninde eki turǵyn úı jáne qora-qopsy zaqymdandy», - deıdi SQO TJD basqarma basshysy Dmıtrıı Rastıhın.
SQO-da jaqyn kúnderi saıajaı maýsymy bastalady. Turǵyndar qala syrtyna, saıajaı ýchaskelerine aǵylady. Departament qyzmetkerleri órttiń aldyn alý maqsatynda reıdterdi bastap ketti. Olar saıajaı qaýymdastyqtaryn, ormandy alqaptardy aralaıdy. Quramyna qutqarýshylardan bólek, orman mekemeleriniń qyzmetkerleri, jergilikti polıtsııa qyzmeti ókilderi, volonterler kirgen.
«Jeldi, ystyq jáne qurǵaq kúnderi ot jaǵýǵa qatań tyıym salynǵan. Órt qaýipsizdigi erejesin buzǵandarǵa ákimshilik jaýapkershilik qarastyrylǵan.
Jalpy jyl bastalǵaly óńirde 194 órt tirkeldi, 21 adam qutqaryldy, 505 adam qaýipsiz jerge shyǵaryldy. Órttyń saldarynan 26 adam mert boldy, onyń ekeýi – bala. 31 adam jaraqat aldy. 71 ǵımarat joıylyp, 107 ǵımarat buzyldy», - deıdi SQO TJD bólim bastyǵy Serik Shaqabaev.
Jalpy ótken aptada 8 órt tirkeldi. Sonyń úsheýi Petropavlda boldy.
16 sáýir kúni keshke qaraı «Tbılısı» meıramhanasynyń órtenip jatqanyn sol mańdaǵy kórshi úılerdiń biriniń turǵyny habarlaǵan.
Órttiń shyǵýyna elektr jelileriniń qysqa tuıyqtalýy sebep bolǵan. Ázirge kelgen shyǵyn mólsheri belgisiz.